Lajmin e ka konfirmuar Policia e Kosovës në një njoftim për media, ku është bërë e ditur se në orët e hershme të mëngjesit nga personeli i disa shkollave ka pranuar informacione per kërcënime me mjete shpërthyese.
Kurse sipas njoftimit thuhet se kërcënimet janë pranuar përmes formës elektronike dhe linjave telefonike.
“ Me datën 16.06.2022 në orët e hershme të mëngjesit nga personeli i disa shkollave ka pranuar informacione për kërcënime me mjete shpërthyese (bomba) në disa objekte shkollore, të ndodhura kryesisht në zona të banuara me popullatë serbe.Bazuar në informacionet e deritanishme, këto kërcënime janë bërë në rajone të ndryshme në disa objekte shkollore (deri më tani në rreth 30 lokacione), e të cilat kërcënime janë pranuar përmes formës elektronike dhe linjave telefonike”, thuhet në njoftim.
Policia e Kosovës menjëherë ka ndërmarrë të gjitha masat dhe veprimet e nevojshme policore në funksion të trajtimit dhe hetimit të këtyre rasteve, duke angazhuar njësitet relevante policore, përfshirë ato për trajtimin e materieve shpërthyese dhe njësitin me qenë (K-9).
Kurse deri në këtë fazë Policia ka bërë të ditur se alarmet kanë qenë kërcënime të rrejshme, teksa kanë ftuar qytetarët të mos krijojnë panik.
“Deri në këtë fazë Policia e Kosovës ka arritur ti trajtoj dhe verifikojë disa nga objektet shkollore, të cilat kanë rezultuar të jenë kërcënime të rrejshme, andaj ftojmë qytetarët që të mos krijojnë ndonjë panik, pasi Policia e Kosovës është prezente dhe e angazhuar në trajtimin, hetimin dhe ofrimin e sigurisë në të gjitha lokacionet në nivel vendi”, thuhet tutje.
Ndërsa në orët e para të mëngjesit të së enjtes edhe në disa shkolla në Novobërdë, Kamenicë dhe Ranillug është pranuar një alarm për bombë./teve1.info./