Shenjat që i kishte në qafë, po del të mos kenë qenë shenja dhune.
Ato, sipas Policisë së Kosovës ishin vetëm disa vizatime me ngjyrë të kuqe, të cilat ky i ri serb i bëri bashkë me shokët e tij.
Në këtë mënyrë, me prezantim të fakteve, Policia e Kosovës po hedhë poshtë pretendimet se ndaj këtij maturanti të komunitetit serb, u përdor dhunë e tepruar nga zyrtari policor Dylot Brahimi.
Për t’i prezantuar provat, në një konferencë për media u paraqit vet drejtori i përgjithshëm i Policisë, Gazmend Hoxha.
“Në këto imazhe është vërtetuar që shenjat me ngjyrë në qafë i njëjti i kishe pasur edhe para veprimit/ intervenimit të zyrtarëve tonë policorë. Ku shenja të tilla me ngjyrë kanë pasur edhe personat e tjerë pjesëmarrës në këtë defilim. Po ashtu edhe në deklaratën e tij zyrtare të vetë palës që e ka dhënë dje në stacionin policorë në Mitrovicë të cilën e ka dhënë në prezencë të prindit të tij ka thënë se këto shenja janë të vendosura me ngjyrë markeri nga shokët e klasës së tij”, tha drejtori i PK-së.
Policia e Kosovës, sipas Hoxhës ndërhyri në këtë ecje të maturantëve, vetëm për të mos eskaluar situata, pas provokimeve të këtyre të fundit.
“Gjatë zhvillimit të defilimit saktësisht te pjesa e kafiterive disa pjesëmarrës kanë filluar të provokojnë qytetarët që kanë qenë ulur në kafiteri me thirrjet Kosova është zemra e Serbisë dhe duke bërë simbolin me tre gishtërinjtë në këto rrethana me qëllimin e vetëm që situata të mos përshkallëzohet mes nxënëseve dhe qytetarëve që kanë qenë në kafiteri, kanë ndërhyrë pjesëtarët e policisë së Kosovës që kanë qenë të caktuar për mbarëvajtjen e manifestimit apo defilimit”, u shpreh Hoxha të dielën në një konferencë për media.
Që nga ky rast, drejtori i përgjithshëm i Policisë tregoi se zyrtari policor është duke u përballur me kërcënime të rënda.
“Sa i përket kërcënimeve zyrtari policor ka pranuar kërcënime në rrjetet sociale të cilat menaxhohen nga grupet e Serbeve në Veri duke bërë thirrje për vrasjen e tij dhe duke kthyer atë në një kufomë apo xhenaze siç kanë thënë ata. Këto kërcënime/ kanosje do të trajtohen seriozisht nga Policia e Kosovës”, tha Hoxha.
I gjithë rasti, sipas drejtorit Hoxha u bë kaq mediatik, për shkak të propagandës serbe.
“E gjithë kjo është një përndjekje e policëve tanë dhe kjo propagandë e vazhdueshme e fabrikuar dëshmon se Policia e Kosovës është bërë traget i sulmeve hibride që burimin e kanë ën Beogradin zyrtarë”, u shpreh Hoxha.
Për zyrtarin policor Dylot Brahimi, shteti i Serbisë tashmë ka lëshuar një fletarrest.
