Policia e Kosovës ka reaguar pas deklarimeve dhe publikimeve nga disa mediume, se kinse gjatë ditës së djeshme në një fshat të komunës së Leposaviqit, dy të rinj të nacionalitetit serb janë rrahur/keqtrajtuar nga zyrtarë policorë .
Me këtë rast Policia ka njoftuar se ka marrë të gjitha veprimet e nevojshme për të verifikuar informacinin dhe deklarimet e publikuara por që sipas Policisë, ka rezultuar se nuk ka ndonjë rast të raportuar apo evidentuar në institucionet kompetente.
“Bazuar në informacionet dhe verifikimet zyrtare me të gjitha njësitet policore në terren, përfshirë ato kufitare, është vërtetuar se një rast i tillë nuk është raportuar në Polici të Kosovës, informacion ky i cili iu është kumtuar mediave të interesuara kryesisht serbe. Deklarimet dhe publikimet në fjalë, sipas kompetencës, Policia e Kosovës i ka adresuar te Inspektorati Policor i Kosovës për trajtim dhe kompetencë të mëtejme”, thuhet në njoftim.
Teksa nga Policia kanë ftuar mediat që për informacione zyrtare t’i adresohen Policisë së Kosovës.
“Policia e Kosovës mbetet e përkushtuar në realizimin e detyrave dhe autorizimeve ligjore, në interes të ruajtjes së rendit dhe sigurisë publike si dhe ofrimit të sigurisë ndaj të gjithë qytetarëve pa dallim, dhe njëkohësisht fton të gjithë qytetarët që për çfarëdo rasti apo kërkese t’i adresohen institucionit policor për trajtimin e tyre. Po ashtu ftojmë edhe mediat që për informacione zyrtare t’i adresohen Policisë së Kosovës”, thuhet tutje./teve1.info./
