Policia e Kosovës gjatë një aksioni ka arrestuar të dyshuarin për kultivim të bimëve narkotike në Kaçanik.
Policia ka bërë të ditur se në dy shtëpitë e të dyshuarit janë gjetur sasi të bimëve narkotike.
Sipas njoftimit, pas informacioneve të pranuara njësitë përkatëse policore kanë trajtuar informacionet sipas procedurave të parapara, duke ndërmarrë veprime hetimore dhe operative të cilat kanë rezultuar me arrestimin e një personi të dyshuar mashkull kosovar.
“Me datë 03.07.2024 lidhur me rastin e lartcekur, njësitë kompetente policore kanë zhvilluar një plan taktik gjatë të cilit edhe është realizuar aksioni policor në fshatin Soponicë – Kaçanik, respektivisht në dy shtëpi të personit të dyshuar mashkull kosovar tek të cilat gjatë kontrollit janë gjetur provat materiale si në vijim: katër bimë të llojit kanabis sativa të gjatësisë rreth 20 cm, substancë e dyshuar narkotike e llojit marihuanë e vendosur në kavanoz xhami me peshë neto 10.6 gram, 80 copë qese najloni të zbrazëta, një pako me rizlla (letër për mbështjellje të marihuanës), një qese najloni me substancë të dyshuar narkotike të llojit marihuanë me peshë 17.2 gram, një thes najloni me substancë të dyshuar narkotike e llojit marihuanë me peshë neto 486 gram, substancë e dyshuar narkotike e llojit marihuanë e vendosur në kavanoz xhami me peshë neto 89.4 gram, një qese najloni me substancë të dyshuar narkotike të llojit marihuanë me peshë 10.2 gram, substancë e dyshuar narkotike e llojit marihuanë me peshë 10.75 gram ( e vendosur ne shishe plastike, dhe një thikë”, thuhet në njoftim.
Më tej thuhet se lidhur me rastin pas përfundimit të kontrollit është kontaktuar prokurori kompetent i cili është njoftuar lidhur me veprimet e ndërmarra policore në teren, ku me autorizim të të cilit i dyshuari pas intervistimit ndalohet për 48 orë.
