Punën në terren e kanë të përditshme në këtë zonë.
Përveç zyrtarëve policorë të trafikut dhe njësive të tjera, brenda policisë së Kosovës ekziston edhe njësiti i inteligjencës së policisë.
Jo pak zyrtarë nga ky njësit po veprojnë në katër komunat veriore.
Në shumicën e rasteve ata merren me luftimin e krimit të organizuar, gjetjen e armëve ilegale, substancave narkotike dhe identifikimin e personave me rrezikshmëri të lartë.
E në komunën e Zveçanit ku janë gjetur sasi të konsiderueshme të armëve kohëve të fundit, një zyrtar i njësisë inteligjente është kërcënuar me jetë nga Lista Serbe, të cilët dyshohet se janë nxitur nga inteligjenca serbe BIA.
Tëvë ka siguruar edhe mesazhet që ka pranuar zyrtari policor i drejtorisë rajonale të policisë, Zveçan.
Aty thuhet se njerëz të fuqishëm janë në përcjellje të zyrtarit policor i cili është emër i njohur për Tëvë1.
Përveç kësaj, Tëvë1 mëson se individ të caktuar të lidhur me BIA serbe, janë duke fotografuar çdo qytetar serb që bisedon me policët në veri të cilët pastaj po ndalohen për intervistim nga policia serbe në momentin që kalojnë në territorin e Serbisë.
Zëvendësdrejtori i policisë për rajonin e veriut, Veton Elshani konfirmoi se ka polic që kërcënohen por që sipas tij, ata duhet ta bëjnë punën e tyre në mënyrë profesionale.
Eksperti i sigurisë, Arben Dashevci thotë se personat që bëjnë kërcënime ndaj policisë, mund të identifikohen lehtë nga organet e rendit.
Tëvë1 ka tentuar të marrë një qëndrim nga Lista Serbe, por ka qenë e pamundur.
Për këtë rast tashmë janë të informuar edhe Njësia e Krimeve të Rënda në Policinë e Kosovës, për çka kanë filluar hetimet.
