Të lumtur e me buzëqeshje në fytyrë, këta të vegjël po shohin nga afër pajisjet që policët zgjodhën t’i prezantojnë në kuadër të aktiviteteve për Ditën Ndërkombëtare të Fëmijëve.
Ani pse i vogël në moshë, Dion Bajralia ka një ëndërr të madhe.
Me shenjën stop në duar e me kapelën e policit në kokë po e shpreh dëshirën që një ditë të bëhet si ta.
“Se mundem me ju ndihmuar kur jeni në kohë më të vështira. U kënaqa me gjithë zemër dhe jam shumë i kënaqur që jam këtu”, shprehet ai.
E ka nga ata që përshtypje u bënë më shumë pjesëtarët e Forcës së Sigurisë së Kosovës.
“Sot më së shumti më kanë pëlqyer ushtarët dhe që na kanë lënë me hip në makinën e ushtarëve”, thotë Andi Guta – nxënës.
Argëtim në këtë aktivitet po gjenin edhe këto vogëlushe.
“Mua shumë po më pëlqen ky aktivitet. Çdo fëmijë kudo në botë ia uroj një qershorin”, shprehet Buna Imeri.
“Sot, një ditë e këndshme 1 qershori mësuesja jonë, e ka bërë një aktivitet për ne me ardh këtu në shesh të gjithë nxënësit të vallëzojmë të bëjmë foto. Ne për momentin jemi duke u kënaq”, shprehet Urata Zenuni.
Detaje për aktivitetin e mbajtur këtu në sheshin e Ferizajt dha togeri Reshat Hyseni.
“Është duke u zhvilluar projekti i drejtorisë rajonale të Policisë në Ferizaj domethënë dita ndërkombëtare e fëmijëve. Këtu jemi të gjitha njësit policore duke filluar nga njësia e biçikletave, njësia e motoristëve, njësia reagues, njësia e trafikut, janë hetime, po ashtu është njësia e forenzikës. Më këtë rast fëmijët kanë mundësi që t’i shohin dhe të ballafaqohen me të gjitha ato pajisje e gjëra me të cilat ne punojmë”, u shpreh ai.
E drejtoresha për Kulturë, Rini e Sport në këtë komunë, Xhemile Murati pati një mesazh për fëmijët.
“Ajo se çfarë vlen për t’u veçuar sot janë më të vegjlit fëmijët, fëmijët të cilët shfrytëzoj rastin dhe të ju urojë ditën e tyre. Gëzuar 1 qershori, dita ndërkombëtare e fëmijëve, por unë shpresoj dhe besoj se në secilën familje fëmijët kanë hapësirën e tyre dhe çdo ditë për ta është festë”, tha ajo.
Në nder të kësaj dite, në sheshin e qytetit të Ferizajt ishin edhe Zjarrfikësit, Ekipet e Emergjencës, por edhe pjesëtarë të KFOR-it.
Festë për Ditën e Fëmijëve, pati edhe në qytete të tjera të Kosovës.
