Ka më shumë se 11 vite që punon në Policinë e Kosovës.
Merita Kadriu shërben si zyrtare policore në njësinë e Komunitetit, në kuadër të Stacionit Policor Qendra në Prishtinë.
Ajo thotë se përgjatë këtyre viteve i ka rastisur që shpesh nëpër festa zyrtare, të jetë në krye të detyrës.
Kadriu që është edhe nënë, tregon për ndjenjat e saj gjatë kohës që në festa nuk është pranë familjes.
“Përkundër sfidave që i kemi të shumta, sfidë më e madhe e imja është kur në festa të ndryshme qoftë ajo e Vitit të Ri, Bajramit i lë fëmijët vetëm duke mos qenë prezent me to në festat e tyre. Kjo është mungesa ime e vetme përndryshe të gjitha sfidat që më dalin para mundohem t’i kalojë në mënyrën ma të madhe dhe kjo është vetëm brenda dhe sfida më e madhe që i lë vetëm vajzat por është nder të jesh pranë qytetarëve 24/7”, shprehet Kadriu.
Mirëpo shton se kohën e humbur me ta, mundohet ta kompensojë jashtë festave në ditët e pushimeve.
“Fatmirësisht e kam mbështetjen e bashkëshortit dhe familjes sime të madhe që kam, dhe më mbështesin çdo herë kur kam nevojë të jem në orar të punës, kam përkrahjen e tyre kështu që edhe ne kemi ditë pushimi dhe atë kohë unë mundohem me qenë e lirë me kompensu me fëmijët me nda edhe ata mos me i lënë anash për asnjë moment”, thotë ajo.
Edhe Ilir Bislimi ka dy dekada që është në shërbim të qytetarëve si zyrtar policor dhe shpesh i ka rastisur të punojë në festa.
“Jam prind i katër fëmijëve dhe në shumicën e festave më ka ndodhë që nuk kam qenë pranë familjes për me i festu festat por, për Policinë është normale me qenë në punë edhe gjatë festave, këto ditë që mungojmë në familje i kompensojmë edhe ditëve tjera”, shprehet Bislimi.
Si shef i Njësisë së Reagimit të Shpejtë, thotë që kryesisht në festa të fundvitit janë të gatshëm për ofrimin e sigurisë për qytetarët.
“Edhe në festa ne do të jemi pranë qytetarëve, njësia që unë e menaxhoj jemi të angazhuar në orar 12-orësh gjatë festave për shkak të fluksit të madh të qytetarëve dhe e mbulojmë intervalin 24 orë… Bazuar në të kaluarën kryesishsht dominojmë rastet e lëndimeve nga fishekzjarret… Apeloj tek qytetarët që të kenë kujdes te përdorimi i mjeteve piroteknike dhe të na kalojë kjo festë pa ndonjë incident”, thotë Bislimi.
Për festat e fundvitit Policia në gjithë vendin tashmë ka ndërmarrë masat për ofrimin e sigurisë.
