Arsenali i armëve që u konfiskua së fundmi nga Policia e Kosovës, siç u bë e ditur nga institucionet e sigurisë u planifikua të kryhej një sulm terrorist në pjesën veriore të vendit.
Por, me këto dhe armë tjera të konfiskuara ndër vite, së voni u raportua se po mendohet që ato të futen në përdorim nga zyrtarët policorë.
Rreth kësaj çështjeje, televizioni ka marrë një përgjigje nga Policia e Kosovës, ku thuhet se nuk është në kompetencën e saj një vendim i tillë, por se do ta zbatonin nëse do të merrej nga organet e drejtësisë.
“Vendimet për të përdorur asetet apo armët e sekuestruara, nuk janë vendime që merren nga Policia, por merren nga organet e drejtësisë. Ne si Polici e Kosovës edhe në të kaluarën, bazuar në procedurat e parapara dhe vendimet që kanë marr autoritetet e drejtësisë ku përfshihen pajisje të sekuestruara, automjete etj, Policia si institucion i zbatimit të ligjit ka implementuar këto vendime të autoriteteve kompetente dhe këto pajisje i ka përdorur për realizimin e detyrave dhe autorizimeve të saj ligjore”, thonë nga Policia e Kosovës.
Informacion për një gjë të tillë nuk kanë as nga Komisioni Parlamentar për Siguri dhe Mbrojtje.
Por, deputeti nga Lëvizja Vetëvendosje, Enver Dugolli vlerëson se një vendim i tillë nuk do të paraqiste problem nëse do të merrej nga Gjykata.
Njëjtë mendon edhe njëri nga ish-drejtorët e këtij institucioni, Rashit Qalaj.
Megjithatë, ky thotë që Policia duhet të fokusohet më shumë tek blerja e armëve të sofistikuara në mënyrë që zyrtarët policorë të kenë efikasitet më të madh në punën e tyre.
Që nga paslufta, numri i armëve pa leje në Kosovë është vlerësuar të jetë shumë i madh. Llogaritet se mbi 200 mijë armë të tilla vazhdojnë të jenë në duar të qytetarëve. Përdoruesit e tyre paraqesin rrezik për sigurinë publike.