Policia e Kosovës ka shtuar prezencën nëpër sheshet e kryeqytetit, për shkak të rritjes së numrit të qytetarëve për festat e fundvitit. Drejtori i Policisë në Rajonin e Prishtinës ka treguar për tëvë1 se masat janë shtuar me qëllim të ofrimit të sigurisë për qytetarët.
Janë vigjilent në kryerjen e detyrës.
Policët me armë të gjata e në rroba civile po patrullojnë nëpër sheshet e kryeqytetit, për shkak të festave të fundvitit.
Edhe pjesëtarët e Njësisë Speciale e kanë shtuar prezencën nëpër lokacione të ndryshme, me fokus në qendër të Prishtinës.
Prania e tyre po i gëzon qytetarët, por edhe disa fëmijë që shprehin dëshirë për t’u fotografuar me ta.
Drejtori Rajonal i Policisë në Prishtinë, Basri Shabani tregon për televizionin rreth masave që i kanë ndërmarrë për ofrimin e sigurisë.
“Ne kemi paraparë këtë shtim të numrit të zyrtarëve policorë kryesisht nëpër vendet më të frekuentuara siç janë qendrat tregtare dhe sheshet në përgjithësi e në veçanti në kryeqytet, por pa anashkaluar asnjëherë angazhimin e të gjitha këtyre njësive edhe në qytetet të cilat frekuentojnë apo janë në kuadër të DRP Prishtinë, e që janë Podujeva, Fushë Kosova, Obiliqi, Graçanica, Lipjani dhe Drenasi”, ka deklaruar ai.
Sipas tij, ndërmarrja e këtyre masave ka dhënë efekt.
Ai theksin se kanë mjaftueshëm zyrtarë policorë.
“Me siguri se numri i popullatës dhe frekuentimi është më i madh në kryeqytet e kryesisht në rajonin e Prishtinës, normalisht ku është numri më i madh i qytetarëve edhe numri i problematikës edhe qarkullimi në komunikacion është pak më i vështirësuar. Megjithatë ne kemi nr të mjaftueshëm të zyrtarëve policorë që kemi paraparë ti angazhojmë gjatë fetave të fundvititit dhe ato do të vazhdojnë deri kah mesi apo deri në përfundim të festave të fundvitit, por jo vetëm”, tha ai.
Shtimin e këtyre masave e kanë mirëpritur edhe pronarët e shtëpizave të vendosura nëpër shesh, ku thonë se ndihen më të sigurt me praninë e tyre.
“Janë të mirëseardhur Policia gjithmonë, pa ta s’ka siguri kështu që janë në nivel të duhur ne i shohim çdo ditë kah 4-5 patrulla të Policisë për neve është e mirëseardhur kjo. Po prej ditës së parë ka pas, patrulla të ndryshme ka pasë të njësive prej policëve të thjeshtë deri te NJSO kështu që janë të mirëseardhur për neve shumë se na mbështetemi tek ta dhe pa ta s’kemi jetë ne”.
Përpos qendrës, pjesëtarët e Policisë janë vendosur nëpër pika të ndryshme në kryeqytet për ofrimin e sigurisë për qytetarët.
