Në vitin 2023 Gjykata Supreme u dha të drejtë zyrtarëve policorë të Kosovës për pagat e 13-ta dhe shujtat ditore.
Përmes këtij vendimi, kjo Gjykatë obligoi Qeverinë e Kosovës që t’ua paguajë policëve të Kosovës shumën e mbledhur ndër vite për këtë shtesë.
Mirëpo ende nuk është bërë kompensimi i tyre nga Ministria e Punëve të Brendshme, ndonëse kjo është rekomanduar edhe nga Zyra Kombëtare e Auditimit në raportet vjetore financiare.
Policia e Kosovës dhe Ministria e Punëve të Brendshme nuk i janë përgjigjur interesimit të televizionit se pse ende nuk janë bërë këto pagesa.
Një nga ish-drejtorët e këtij institucioni, thotë se as ai nuk është kompensuar për këto mjete dhe se janë në pritje.
“Disa prej tyre e kanë marrë e kanë realizuar të drejtën e pagës dmth nuk është kontestuese se a ju takon apo jo, por është cështje kur Gjykata vendosë për ato unë personalisht jam në pension, kam autorizu një avokat që më përfaqëson por ende nuk i kam marrë, ende në pritje sikur të tjerët, ndoshta do të ndodhë ajo”, tha koloneli në pension, Reshat Maliqi.
Situatë e njëjtë është edhe me nënkolonelin në pension, Refki Morina i cili thotë se rimbursimi i tyre duhet të jetë më i shpejtë.
“Pasi Gjykata Kushtetuese ka vendosë që na takojnë edhe vendimet gjyqësore që merren në shkallën e parë dhe në të Apelit dmth të përshpejtohen këto sepse kjo shkon edhe në dëm të personave që marrin pagën e 13-të dhe shujtën etj por edhe në dëm të shtetit sepse të gjitha këto e kanë një kamatë prej momentin kur ju takon atyre kamata ecë dhe kështu që dëmtohet edhe buxheti shtetëror”, tha Morina.
Mijëra pjesëtarë të Policisë kishin bërë padi për këtë lloj shtese e që vlera totale e kompensimit të tyre është përafërsisht 20 milionë.
