Mesfushori i Juventusit, Paul Pobga është suspenduar për katër vjet për shkak të dopingut, kanë njoftuar mediumet e huaja të enjten.
Vendimi për suspendimin e francezit është marrë nga gjykata e Federatës së Futbollit të Italisë, ndërsa është pranuar edhe nga agjencia e anti-dopingut.
Pogba kishte dështuar në testin e dopingut më 20 gusht të vitit të shkuar pas përfundimit të duelit mes Juventusit dhe Udineses, ndeshje në të cilën nuk kishte luajtur fare. Ai kishte rezultuar pozitiv në këtë test dhe në shtator u pezullua përkohësisht, përpara se të dështoj edhe në testin e dytë të bërë në muajin tetor.
Prej muajit shtator të vitit të shkuar, Pobga nuk është stërvitur me pjesën tjetër të Juventusit dhe po ashtu, paga e tij u shkurtua në 2400 euro në muaj.
Gjykata e federatës italiane asnjëherë nuk besoi në versionin e mbrojtjes, e cila kishte refuzuar marrëveshjen për pranimin e fajësisë.
30-vjeçari këtë edicion ka vetëm dy paraqitje në Serie A apo në total 52 minuta lojë. Ky suspendim i rëndë mund t’i jap fund edhe karrierës së Pogbas.
