Avokati Visar Rrecaj, në emisionin “Këndi i debatit” në Tëvë1, ka komentuar ndërtimin e dy urave të reja mbi lumin Ibër në Mitrovicë, projekt i cili ka nxitur reagime nga disa shtete evropiane.
Rrecaj tha se ndërtimi i urave dhe rrugëve është një nevojë reale për të gjithë Kosovën, jo vetëm për Mitrovicën, duke shtuar se ky projekt duhet të shihet si investim në zhvillimin ekonomik dhe infrastrukturor, dhe jo si veprim i motivuar politikisht.
“Edhe në Mitrovicë këto ura i kontribuojnë zhvillimit ekonomik dhe infrastrukturor. Mirëpo, unë uroj që këto të mos jenë veprime parazgjedhore, sepse mua më duket se po ‘vjen era zgjedhje’,” tha Rrecaj.
Ai komentoi gjithashtu reagimin e shteteve evropiane, duke theksuar se nuk është hera e parë që ato shprehin shqetësime në lidhje me moshapjen e Urës Kryesore mbi lumin Ibër.
“Sa i përket reagimit të shteteve evropiane, ky reagim ka qenë që moti, sepse vazhdimisht është ngritur çështja e mosfunksionalizimit të urës kryesore, e cila kërkon një zgjidhje krejt tjetër,” shtoi ai.
Sipas Rrecajt, debatet për këtë çështje kanë ndodhur shumë herë në të kaluarën, por zgjidhja mbetet e ndërlikuar dhe kërkon vullnet të dyanshëm.
