Kombëtarja e Shqipërisë do të luajë në fazën “play-off” për kualifikim në Botërorin 2026, ndërsa paraqitjen në “play-off”, e ka të garantuar edhe Kosova.
Por Kosova me fitore 6:0 të martën ndaj Zvicrës, kualifikohet direk, gjë që ka fare pak gjasa të ndodhë, kështu që edhe te Kosova pritet të bëhen gati për “play-off”.
Nëse vazhdon në “play-off”, është e sigurt që Kosova do të jetë në vazon e tretë, ku rrjedhimisht do të luajë me një kombëtare të vazos së dytë në gjysmëfinale të fazës “play-off”, kurse do të jetë mysafire.
Sipas pozitave aktuale në grupe, në vazon e tretë për short do të jenë edhe Shqipëria, Maqedonia e Veriut dhe Bosnjë-Hercegovina.
Por edhe Maqedonia e Veriut dhe Bosnjë-Hercegovina, njëjtë si Kosova, janë në garë për kualifikim direkt dhe shumë gjëra mund të ndryshojnë deri të martën mbrëma, kur përfundojnë kualifikimet e rregullta evropiane për Botërorin 2026.
Prej vazos së tretë, sipas gjendjes aktuale, në vazon e dytë mund të lëvizë Shqipëria, por kjo varet nga rezultati i ndeshjes me Anglinë, por edhe nga rezultatet e disa kombëtareve të tjera.
Në vazon e dytë, pra rivale potenciale të Kosovës, aktualisht janë Hungaria, Skocia, Sllovakia dhe Çekia.
Renditja nëpër vazo bëhet në bazë të ranglistës së FIFA-s.
Shorti për “play-off” tërhiqet të enjten, ndërsa të mërkurën publikohet ranglista e FIFA-s, në bazë të cilës ndahen përfaqësueset në vazo.
Në vazon e parë pritet të jenë Italia, Turqia, Ukraina e Polonia. Në të katërtn do të jenë fituese të grupeve në Ligën e Kombeve, që nuk përfundojnë në dy pozitat e para në kualifikimet e rregullta.
Në vazon e katërt do të jenë Uellsi, Suedia, Rumania dhe Irlanda e Veriut. Kështu që, në gjysmëfinale, kombëtaret e vazos së parë takohen me ato të vazos së katërt. Kombëtaret e vazos së parë janë vendase.
Për finale të fazës “play-off”, vendasi do të përcaktohet me short. Prej 16 kombëtareve në “play-off”, katër do të kualifikohen në Botëror.
Gjysmëfinalet e fazës “play-off”, janë më 26 mars, ndërsa finalet më 31 mars.
