Momentalisht nuk ka një “parafinancim” për Kosovën e Serbinë, sipas Planit të Rritjes për Ballkanin Perëndimor.
Zëdhënësi i Komisionit Evropian, Guillaume Mercier, ka bërë të ditur se në procedurat për “Planin e Rritjes”, ka parakusht për Kosovën dhe Serbinë, që të angazhohen në dialogun për normalizim të marrëdhënieve në mënyrë konstruktive.
“Mund ta konfirmojë se në këtë fazë nuk ka paranfinancim për Serbinë dhe Kosovën. Më herët këtë javë e javën e kaluar u bë parafinancimi për Maqedoninë e Veriut e Shqipërisë. Por, procesi po vazhdon për Kosovën e Serbinë”, ka thënë Mercier në konferencë për media.
Ai tha se parakushti për të dyja vendet s’mund të konfirmohet nëse është plotësuar.
“Në procedurat për Planin e Rritjes, ka parakusht kur bëhet fjalë për Serbinë e Kosovën, e që është të angazhohet në mënyrë konstruktive në dialogun për normalizim të marrëdhënieve. Në këtë fazë s’mund të konfirmojë nëse parakushti është plotësuar apo jo. Do të shpjegohet kur të merret një vendim sa i përket parafinancimit”.
Mercier ka thënë se duhet bërë vlerësime të kritereve të ndryshme, dhe parakushti për angazhimin konstruktiv është një nga to.
Kosova nuk e ka ratifikuar në Kuvend “marrëveshjen për kredi” me BE-në dhe derisa të mos e bëjë këtë nuk mund të marrë pagesa. Ndërkohë, ndaj Kosovës BE-ja po i mban masat ndëshkuese të vendosura në qershorin e vitit 2023./teve1.info/
