Të shtëna me armë zjarri ka pasur pasditen e së premtes në rrugën “Miftar Zeqa” në Pejë, ku një burrë është arrestuar nga Policia e Kosovës pasi dyshohet se ka shtënë me armë automatike në drejtim të një veture me targa vendore.
Sipas policisë, në veturë kanë qenë katër persona, dy prej të cilëve kanë mbetur të plagosur nga të shtënat. Ata janë dërguar për trajtim mjekësor.
Policia ka arrestuar të dyshuarin dhe ka sekuestruar katër armë zjarri, dy pushkë automatike AK-47 me gjithsej 33 fishekë, dy pistoleta (njëra me 5 fishekë) dhe 75 fishekë të tjerë të armës automatike.
Pas intervistimit, me vendim të prokurorit, i dyshuari është dërguar në mbajtje, ndërsa hetimet për zbardhjen e plotë të rastit janë duke vazhduar.
“Rr. Miftar Zeqa, Pejë 17.10.2025 – 16:15. Është arrestuar i dyshuari mashkull kosovar, për shkak se me armë automatike kishte shtënë në drejtim të veturës me targa vendore në të cilën kanë qenë katër persona meshkuj kosovarë. Si pasojë e të shtënave janë plagosur dy persona në veturë. Në vendin e ngjarjes kanë dalë të gjitha njësitë relevante policore dhe janë duke e hetuar rastin. Nga i dyshuari janë konfiskuar katër armë zjarri si: dy pushkë automatike AK-47 me nga 18 dhe 15 copë fishekë, dy pistoleta njëra me 5 copë fishek dhe 75 copë fishekë tjerë të armës automatike. I dyshuari pas intervistimit me vendim të prokurorit është dërguar në mbajtje”, thuhet në raportin e PK-së./teve1.info/
