Tre persona kanë mbetur të plagosur, si pasojë e të shtënave me armë zjarri, në orët e para të mëngjesit të sotëm në Gjakovë.
Për gjendjen e tyre shëndetësore ka dhënë detaje Spitali i Përgjithshëm i Gjakovës“Isa Grezda”.
Përmes një njoftimi është bërë e ditur se dy nga të plagosurit kanë lëndime në ekstremitetet e poshtme të trupit.
Ndërkohë, pas trajtimin mjekësor që kanë marrë në emergjencë, ata janë transferuar në Repartin e Ortopedisë, ku gjendja e tyre tashmë është stabile.
Ndërkaq, personi i tretë është në operacion, për shkak se ka pësuar lëndime në pjesën e poshtme të shpinës, ku nga mjekët është dashur ndërhyrje kirurgjikale.
“Stafi mjekësorë po vazhdon trajtimin dhe kujdesin e duhur profesional”, thuhet në njoftim.
Ndërkaq, për teve1.info, zëdhënësi i Policisë së Kosovës për rajonin e Gjakovës, Sheremet Elezaj, tha se i dyshuari për këtë rast është në kërkim.
“Aktualisht jemi duke kryer procedurat e nevojshme hetimore në drejtim të zbardhjes së rastit dhe kapjen e të dyshuarit. Në konsultim me prokurorin e shtetit është iniciuar rast ‘Vrasje në tentativë” dhe “Mbajtje në pronësi, kontroll ose posedim të paautorizuar të armëve’”, tha Elezaj.
Ngjarja ka ndodhur në një lokal në rrugën “Fan Stilian Noli”./teve1.info/
