Tek ura e Bistricës në Komunën e Zveçanit , në orët e vona të së hënës, qytetari i komunitetit serb, Millan Jovanoviq u plagos me armë zjarri.
Ky u dërgua për trajtim më pas në Spitalin rajonal të Mitrovicës Veriore.
Lidhur me rastin, Policia e Kosovës njoftoi se janë suspenduar katër zyrtarë policor, njëri prej tyre dyshohet të ketë shtënë më armë zjarri.
“Si rezultat i hetimeve të pandërprera dhe i angazhimeve të njësiteve policore në vendin e ngjarjes, si dhe si rezultat i ekzaminimit të dëshmive të siguruara, është arritur të sigurohen dëshmi të cilat tregojnë dyshimet për përfshirje të mundshme të një zyrtari policor në gjuajtje me armë zjarri. Bazuar në informacionet dhe dëshmitë e siguruara janë marrë masa të suspendimit ndaj zyrtarit policor, pasi i njëjti nuk kishte raportuar lidhur me rastin dhe për përfshirjen e tij në rast, nga ku PK-ja kishte lëshuar njoftim se nuk ka qenë e përfshirë në shkëmbim apo gjuajtje me armë zjarri. Po ashtu janë marrë masa të suspendimit edhe ndaj tre zyrtarëve të tjerë të mundshëm të përfshirë në rast”, thuhet nw komunikatën e PK-së.
E sipas njohësit të çështjeve të sigurisë, Hysen Gecaj këto sulme janë të orkestruara nga grupet kriminale në veri, të mbështetura nga Beogradi.
Madje, ai thotë se që nga largimi i serbëve nga institucionet, veçanërisht nga Policia, situata e sigurisë vazhdon të jetë e brishtë.
Për këtë plagosje ka reaguar edhe Lista Serbe, të cilët përmes një shkrimi kanë kërkuar largimin e menjëhershëm të Njësive Speciale në atë pjesë të vendit pasi siç thonë po e ngacmojnë popullin serb atje.
Kronika e realizuar nga gazetari Lindrit Zejnullahu
