Policia e Kosovës ka njoftuar se ata u plagosën nga arma e zjarrit nga persona të cilët ishin me një automjet të udhëtarëve në lëvizje që po qarkullonte nga Shtërpca në drejtim të Ferizajt.
“Sot, datë 06.01.2023 rreth orës 15:19 policia e stacionit në Shtërpcë ka pranuar një informacion se në fshatin Drajkovc të Shtērpcës dy persona, njëri rreth 11 vjeçar dhe tjetri rreth 21 vjeçar janë plagosur nga arma e zjarrit nga personi/persona të panjohur i cili/të cilët ishin me një automjet të udhëtarëve në lëvizje, që po qarkullonte nga Shtërpca në drejtim të Ferizajt dhe më pas janë larguar nga vendi i ngjarjes”, thuhet në njoftim.
Nga Polica kanë bërë të ditur se të lënduarit janë dërguar në Qendrën e Mjekësisë Familjare në Shtërpcë.
“Dy të lënduarit për ndihmë mjekësore janë dërguar në Qendrën e Mjekësisë Familjare në Shtërpcë dhe pas marrjes së ndihmës së parë në Shtërpcë, për tretman të mëtutjeshëm mjekësor janë dërguar me autoambulancë për në qytetin e Graçanicës. Të dy të plagosurit nga informacionet që kemi janë jashtë rrezikut për jetë. Janë marrë të gjitha veprimet nga policia , policia e rendit e më pas hetuesit policor dhe krimtekniket nga Sektori Rajonal i Hetimeve, nën autorizim të prokurorit kujdestar nga PTH-Ferizaj kanë dalë në vendin e ngjarjes dhe i kanë nisur hetimet”, thuhet më tej në njoftim.
Sipas PK-së, aktualisht rruga që çon për në Shtërpcë është e bllokuar nga të dy drejtimet e lëvizjes. /Teve1.info/
