Policia e Kosovës ka bërë të ditur se kanë nisur një objekt të ri në Zubin Potok për t’i përmbushur nevojat e zyrtarëve policorë, pasi që Stacioni Policor i vjetër në nuk i ka plotësuar kushtet.
Sipas njoftimit, Stacioni i vjetër ishte i vendosur në një objekt privat me qira.
“Stacioni Policor në Zubin Potok është i vendosur në një objekt privat, me qira dhe i cili objekt nuk ka plotësuar kushtet për ofrimin e shërbimeve për qytetarët dhe për punë të zyrtarëve policorë të rendit. Kështu, Policia e Kosovës me kohë ka filluar procedurat për përmirësimin e infrastrukturës (ndërtimin e një objekti të ri) në Zubin Potok”, thuhet në njoftim.
Lidhur me të drejtat ligjore për ndërtimin e këtij Stacioni Policor, policia thotë se janë ndjekur të gjitha procedurat ligjore.
“Lidhur me procedurat e ndërtimit të objektit të SP Zubin Potok, që kanë filluar kohë më parë, janë ndjekur të gjithë hapat e duhur procedural e ligjor si: Vendimi përfundimtar i shpronësimit nr. 05/28 , datë 05.02.2018, – pronë shoqërore, lëshimi i kushteve ndërtimore nga Drejtoria e Urbanizmit KK Zubin Potok dt. 03.12.2020, më 11.05.2022 – pranimi i njoftimit nga komuna Zubin Potok për plotësim të dokumentacionit për regjistrim të pronës në emër të Policisë së Kosovës, komfor vendimit të Qeverisë si dhe pëlqimi për qasje në rrugë, certifikata e pronësisë P- 72908055-01305-0, pas bartjes së pronës në emër të PK-së, është lëshuar edhe Vendimi për qasje në rrugë dt.19.08.2022 nr. 112/2022, me datë 23.10.023 PK-ja është pajisur me Leje ndërtimore, për ndërtimin e objektit sipas Marrëveshjes së Mirëkuptimit të nënshkruar me datë 10.12.2021 mes PK-së dhe Agjencisë së Regjistrimit Civil për projektin”, thuhet në komunikatën për media të Policisë së Kosovës”, thuhet në njoftim.
Ndërkohë, policia ka siguruar që ky Stacion Policor në Zubin Potok do t’i shërbejë tërë komunitetit që jeton në atë zonë.
“Stacioni Policor dhe zyrtarët policorë që do të punojnë aty (Zubin Potok), do t’i shërbejnë tërë komunitetit që jeton në atë zonë dhe nuk ka të bëjë me qëllime tjera siç spekulohet nga individ apo subjekte politike serbe”, kanë përfunduar komunikatën e tyre Policia e Kosovës”./teve1.info/
