Një protestë ishte paralajmëruar për ditën e sotme nga pjesëtarët e Njësisë Speciale Intervenuese në Policinë e Kosovës. Por ajo u anulua pas premtimit që morën nga kryeministri Kurti se do t’i presë ata në takim. Këtë e mirëpritën edhe nga Sindikata e Policisë ku thanë se presin që ekzekutivi të reflektojë në kërkesat e të gjithë zyrtarëve policorë, jo vetëm ata specialë.
Një pamje e tillë u paralajmërua të shihej sërish të martën.
Pjesëtarët e Njësisë Speciale Intervenuese kishin në plan që ende pa u mbushur një javë nga protesta e parë, ta zhvillojnë të dytën.
Por, protesta u pezullua pas premtimit të kryeministri, Albin Kurti, i cili tha se do t’i priste ata në takim.
“Deri te pezullimi i protestës ka ardhur pasi Drejtori i Përgjithshëm i PK-së, i shoqëruar nga menaxhmenti i PK-së, gjatë takimit me këto njësi i ka informuar se Kryeministri i Republikës së Kosovës ka premtuar që javën e ardhshme do ti pres në takim zyrtar menaxhmentin e PK-së së bashku me përfaqësuesit e këtyre njësive, për t’i diskutuar kërkesat e tyre, respektivisht për të gjetur një zgjidhje”, kanë deklaruar nga Policia e Kosovës.
Ky vendim për dialog, po mirëpritet nga Sindikata e Policisë së Kosovës, të cilët thonë se presin nga Qeveria të reflektojë edhe ndaj kërkesave të njësive tjera.
Në të kundërtën, kryesindikalisti tregon se janë paralajmëruar dorëheqje të mëdha të policëve që nga propozimi i për këto shtesa nga ekzekutivi.
Edhe ish-zv.ministri i Punëve të Brendshme, thekson se është lajm i mirë pezullimi i protestës së njësisë elite të Policisë.
Sipas tij, institucionet duhet plotësuar kërkesat e këtyre efektivëve për shkak se janë gjithmonë në krye të mbrojtjes së sovranitetit të vendit.
Në fund të tetorit, Qeveria kishte ndarë në shtatë kategori shtesat për rrezikshmëri në këtë institucion.
Për njësitë elitare, përkatësisht për Njësinë Speciale Intervenuese, Njësinë për Ndërhyrje të Shpejtë dhe Njësinë për Mbrojtje të Afërt, shtesat u caktuan të jenë prej 150 euro mbi pagën bazë.
Kërkesa kryesore e pjesëtarëve të NJSI-së është që shtesa e rrezikshmërisë të jetë sa gjysma e pagës bazë.
