Më 12 shtator, Ambasada Amerikane njoftoi për pezullimin e dialogut strategjik me Kosovën.
Ky bashkëpunim përfshinte fushën e diplomacisë, energjisë, sigurisë e mbrojtjes.
Por, në këtë të fundit duket se nuk ka ndikuar negativisht dhe institucionet e sigurisë në vend janë në një linjë me Shtetet e Bashkuara të Amerikës.
Ish-kryeinspektori i Agjencisë Kosovare të Inteligjencës, thotë se mund të ketë vetëm implikime të vogla në punën e institucioneve të sigurisë.
“Nuk do të ketë ndonjë komplikim sa i përket situatës së përgjithshme të sigurisë sepse situata e përgjithshme e sigurisë është interes edhe i NATO-s përveç që është i Republikës së Kosovës, pra nuk shoh se do të ketë ndonjë implikim të theksuar apo të jashtëzakonshëm në situatën e përgjithshme të sigurisë marrë parasysh se edhe vetë NATO është përgjegjës përfundimtar sa i përket sigurisë në Republikën e Kosovës”, shprehet Sopiani.
Sipas tij, as në aspektin e rritjes së kapaciteteve mbrojtëse nuk pritet të cenohet partneriteti mes dy vendeve.
“Institucionet e sigurisë, s’po flasë për pjesën politike, po flasë për institucionet profesionale të sigurisë së Kosovës përveç që kanë treguar profesionalizëm të madh kanë qenë edhe partner i jashtëezakonshëm i shteteve të NATO-s në të gjitha rrafshet, qoftë në aspektin operacional, taktik, strategjik. Pra kanë qenë partner i besueshëm dhe do të vazhdojnë të mbesin”, vlerëson ish –kryeinspektori i AKI-së, raporton Tëvë1.
Edhe nënkoloneli në pension i Policisë, Refki Morina vlerëson se nuk pritet të ketë ndonjë ndikim edhe në këtë institucion.
“Për arsye se ne kemi bashkëpunim të vazhdueshëm me Shtetet e Bashkuara të Amerikës dhe një delegacion e pjesëtarë tonë vazhdimisht shkojnë, trajnohen në Shtetet e Bashkuara të Amerikës dhe kemi teknikë teknologji të avancuar mu nga SHBA-të që ësht fjala e fundit e teknikës, teknologjisë, sa i përket sigurisë. Prandaj unë mendoj se kjo nuk do ndikojë në procesin e sigurisë së tërësishëm të Policisë së Kosovës”, thotë Morina.
Ambasada njoftoi se deri te pezullimi kishte ardhur si pasojë e veprimeve të Qeverisë Kurti.
