Policia e Kosovës ka njoftuar se në në 24 orët e fundit janë regjistruar tri raste të përdorimit të armëve në ahengje.
Sipas raportit policor, rastet kanë ndodhur në Prishtinë, në Prizren dhe në Gjakovë.
Bëhet e ditur se në rastin i cili ka ndodhur në rrugën “Kajë Selmani” në Prishtinë janë arrestuar tre persona, ndërsa janë konfiskuar tre armë zjarri, njëra nga to me gaz.
“Janë arrestuar 3 të dyshuar m/k pasi të njëjtit në një aheng familjar kishin shtëne me armë zjarri. Nga të dashurit janë konfiskuar 3 armë zjarri ( njëra nga to me gas). Në vendin e ngjarjes janë gjetur dhe konfiskuar 50 cop fishek dhe 15 gëzhoja të kalibrave të ndryshëm. Me vendim të prokurorit të dyshuarit janë liruar, rasti vazhdon në procedurë të rregullt”, thuhet në raportin 24-orësht të Policisë.
Në rastin që ka ndodhur në Korishë të Prizrenit është arrestuar një person të cilit i është sekuestruar një armë AK47 me 10 fishekë si dhe në vendin e ngjarjes janë gjetur 4 gëzhoja.
“Është arrestuar i dyshuari m/k për shkak se i njëjti kishte shtënë me armë në një aheng familjar. Nga i dyshuari është sekuestruar një armë AK47 me 10 fishekë si dhe në vendin e ngjarjes janë gjetur 4 gëzhoja. I dyshuari pas inicimit të rastit me vendim të prokurorit është dërguar në mbajtje”, bëhet e ditur në raportin e PK-së.
Ndërkaq, në rastin e ndodhur në Mejtë të Gjakovës është arrestuar një person dhe është sekuestruar një pistoletë me tre fishekë.
“Është arrestuar i dyshuari m/k për shkak se i njëjti kishte shtënë me armë në një aheng familjar. Nga i dyshuari është sekuestruar një pistoletë me tre fishekë. Me vendim të prokurorit pas inicimit të rastit i dyshuari është liruar në procedurë të rregullt”, thuhet në raportin e Policisë së Kosovës.
