Korporata Energjetike e Kosovës ka njoftuar se aktualisht po operon njëkohësisht me pesë (5) njësi prodhuese të energjisë elektrike, duke siguruar prodhim me kapacitete maksimale operative dhe në përputhje të plotë me parametrat teknikë të njësive ekzistuese.
Sipas njoftimit, prodhimi bruto ditor i energjisë elektrike tejkalon 20 mijë MËh, çka reflekton stabilitet teknik, siguri operative dhe performancë të lartë të sistemit elektroenergjetik.
KEK nëpërmjet një komunikate sqaron se në kushte të zakonshme operon me katër (4) njësi prodhuese, ndërsa gjatë periudhave me temperatura të ulëta është angazhuar maksimalisht për të vënë në funksion edhe njësinë e pestë.
“Si rezultat, korporata ka arritur të operojë me pesë njësi prodhuese për nëntë ditë që nga 19 dhjetori 2025, përmes ndërhyrjeve të shkurtra operative, si dhe për shtatë ditë gjatë muajit janar 2026, përfshirë edhe ditën e sotme, me vazhdimësi të operimit.Ky nivel operimi konsiderohet i rrallë, veçanërisht duke pasur parasysh moshën e njësive prodhuese dhe kompleksitetin teknik të sistemeve ekzistuese. KEK bën të ditur se Njësia A4 ka startuar gjatë orëve të mbrëmjes dhe është sinkronizuar me rrjetin në orët e para të mëngjesit, ndërsa rikthimi paralel dhe i suksesshëm i Njësive B1 dhe A4 brenda një afati optimal operacional dëshmon kapacitetin profesional të stafit teknik dhe menaxherial, planifikimin e saktë operacional dhe menaxhimin efikas të proceseve të sanimit”, thuhet në njoftimin e KEK-ut.
Në njoftim bëhet e ditur se si rezultat i këtij operimi të qëndrueshëm, sistemi aktualisht po funksionon me kapacitete të plota, duke garantuar furnizim stabil me energji elektrike.
KEK sh.a. thekson se mbetet e përkushtuar për operim të sigurt dhe efikas, menaxhim rigoroz të aseteve prodhuese dhe avancim të projekteve strategjike të modernizimit./teve1.info/
