Tash e 22 vjet punon si mësimdhënëse në këtë shkollë.
E në vitin 2018, Sevdije Sadiku mori edhe pozitën e drejtoreshës së shkollës fillore “Thimi Mitko” në Gjilan.
Por, Sadiku thotë që asaj nuk iu vazhdua mandati edhe për katër vite tjera, edhe pse tregon që i është bërë vlerësimi i perfomancës.
Sadiku, pretendon që pa asnjë arsyetim i është kërkuar nga komuna që ajo të ndërrojë shkollën.
Madje Sadiku thotë se tashmë në vend të saj është emëruar një drejtoreshë tjetër.
Por në degën e Partisë Demokratike të Kosovës në Gjilan thonë që rasti i Sadikut, nuk është i vetmi i këtij lloji.
E nga Komuna e Gjilanit tregojnë se vendimi për transferimin e Sevdije Sadikut është marrë për shkak të lirimit të pozitës në shkollën tjetër.
“Për shkak të pensionit, e njëjta është propozuar si për transferim ne atë shkollë për 6 muaj, me qëllim që të mos lihen punët keq në atë shkollë, deri në një vendim tjetër. Vendimi për transferim është nxjerr nga kryetari i komunës ne bazë të kompetencave të tij në përputhje me legjislacionin në fuqi”.
Sipas DKA-së njoftimi për këtë çështje drejtuar drejtoreshës së kësaj shkolle është bërë verbalisht, prandaj nuk ka një njoftim formal.
