Ishte paraparë që të sillte çmime të njëjta.
Por vendimi për unifikim të çmimit të barnave nuk po gjen zbatim, ndonëse ka mbi një muaj që ka hyrë në fuqi.
Si rrjedhojë, qytetarët po paguajnë çmime të ndryshme, për barnën e njëjtë.
Kësisoj, edhe kjo barnë po vazhdon të shitet me çmim më të shtrenjtë se që ka paraparë Ministria e Shëndetësisë për të.
“Delcabrin” është një medikament që përdoret për të trajtuar nivelet e larta të hormonit të prolaktinës në trup.
I njëjti, sipas listës zyrtare të çmimit të barnave të miratuar nga MSH, kushton 7 euro e 87 cent.
Por në barnatoret në kryeqytet, tëvë1 kuptoi se çmimi i tij varion mbi 9 euro.
Gazetarja: Veç ta di edhe çmimin.
Farmacisti: Këto i ke nëntë euro e gjysmë dy copa.
Gazetarja: Sa është një copë?
Farmacisti: Sa po i bjen, katër e njëzetë.
Farmacistja: Nëntë e gjashtëdhjetë i ki
Farmacistja: Një tabletë kushton katër e gjysmë.
Sa tableta i ka një kuti.
E dikush po propozon një zëvendësim që kushton dyfish më lirë.
Gazetarja: A mundem me ditë çmimin e këtyre, Delcabrin?
Farmacisti: Një tabletë kushton katër euro e tridhjetë centë. Ky tjetri është më i lirë, dy e tetëdhjetë.
Gazetarja: A është i njëjtë a?
Farmacisti: I njëjtë është.
Ndonëse po shitet më shtrenjtë, “Delcabrin” është vështirë edhe për t’u gjetur, pasi ka mungesë të tij.
Por kur të furnizohen, dikush tjetër pritet ta shesë atë 10 euro.
Ndonëse në barnatoren e njëjtë, një qytetare në kushte anonimiteti tha se këtë medikament disa javë më parë e kishte blerë në çmim 6 euro e gjysmë.
Gazetarja: E sa është kështu çmimi?
Farmacistja: Shtatë – tetë
Gazetarja: Sigurt? Se tjerët po e kanë nga nëntë
Farmacistja: Kështu ka qenë por tani vjen me çmim më të lartë.
Deri në dhjetë euro ndoshta shkon. Se kur janë në mungesë kështu tani kur të vijnë, vijnë me çmime të reja.
Këtë rritje të çmimeve, karshi mungesës së barnave, nga Oda e Farmacistëve e quajnë keqpërdorim.
“Rreziku mundet me qenë kjo, mundet me pasë keqpërdores individual në këtë lami, që ka anë e mbanë botës mirëpo mungesat e barnave kanë fillu vetëm të vërehen. Në coftë se nuk merren hapa të shpejtë do të ketë mungesa edhe më të mëdha të barnave”, tha kryetari i Odës së Farmacistëve, Kadri Bytyqi.
Për krejt këtë situatë, nga kjo Odë fajtor e shohin Ministrinë e Shëndetësisë.
“Ne si Odë në vazhdimësi kemi qenë për unifikim të çmimeve mirëpo vendimi i fundit i dhjetorit i Ministrit të Shëndetësisë e ka prishë këtë balancën sepse ka qenë një vendim që ne e konsiderojmë vendim jo ligjor”, tha ai.
E që nga 1 shkurti, Ministria e Shëndetësisë për Tëvë1 njoftoi se janë kryer 460 inspektime në barnatore.
“Deri më tani janë kryer 460 inspektime në qarkullues farmaceutik me pakicë (barnatore). Gjatë këtyre inspektimeve, është vënë re se barnatoret janë në procesin e vendosjes së çmimeve të reja për produktet medicinale. Po ashtu, AKPPM ka vendosur çmimet sipas Listës Zyrtare në banderolat e produkteve medicinale në importet e reja. Inspektorati Farmaceutik ka obliguar personat përgjegjës në barnatore që të zbatojnë Ligjin dhe të vendosin çmimet në produktet medicinale në përputhje me Listën Zyrtare të Çmimeve”, thuhet nga Ministria e Shëndetësisë.
Të pakënaqur me vendimin për unifikim të çmimit të barnave janë kompanitë e distributorëve farmaceutikë, të cilët thonë se do ta kenë të vështirë të mbijetojnë në treg.
