Fillimisht u intonua himni shtetëror.
Para të pranishmëve, ishin të vendosura dy vepra të prof. dr. Sabile Keçmezi – Basha.
“Ekzekutimi i shqiptarëve nga OZNA dhe UDB-ja jugosllave” dhe “Top sekretet, dëshmi për keqpërdorimet dhe deformimet e shërbimit të sigurimit shtetëror jugosllavë në Kosovë”, janë dy libra që u përuruan në Bibliotekën Kombëtare të Kosovës në Prishtinë.
E fillimisht, recenzentët e librit të parë, dhanë vlerësimet e tyre.
“Veçmas studimi i dr. Sabile Basha i cili prezantohet publikut është me rëndësi ngase me prova i prezanton përpjekjet, luftën dhe sakrificën e popullit tonë për çlirimin e dy të tretës të tokave shqiptare të cilat mbetën nën ish republikën e ish Jugosllavisë”, vlerësoi profesori, Ismet Salihu
“Në këtë studim voluminoz autorja ka grumbulluar fakte dhe dëshmi të shumta për tragjedinë me përmasa kombëtare të popullit shqiptar. Përmasa e kësaj tragjedie edhe pas gati një shekulli as nuk është harruar as nuk është tejkaluar”, tha Nystret Pllana, profesor.
E për librin e dytë, foli profesor Haki Kasumi.
“Ky libër është i mbështetur në dokumente të veçanta arkivore të kohës dhe në burime tjera relevante”, tha ai.
E krejt në fund, foli edhe vet autorja e dy veprave.
Ajo tregoi se jo rastësisht është zgjedhur data e promovimit të veprave në prag të festës së 17 shkurtit.
Sjellin në dritë fakte tronditëse mbi persekutimin, burgosjen dhe ekzekutimin e shqiptarëve nga regjimi jugosllav dhe duhet thënë se jo rastësisht e zgjodha këtë ditë në prag të 17 vjetorit të Pavarësisë së Kosovës”, tha ajo.
Këto dy vepra janë botuar nga Instituti i Historisë “Ali Hadri” në Prishtinë.
