Përtypja e çamçakëzit para gjumit mund të ndihmojë në lehtësimin e simptomave të alergjive sezonale, sipas një mjeku të përgjithshëm të shërbimit shëndetësor britanik (NHS).
Dr. Tim Mercer ka ndarë disa këshilla për mënyrat se si njerëzit mund të mbrojnë shtëpinë nga poleni dhe të reduktojnë simptomat gjatë natës, në një kohë kur sezoni i alergjive sapo ka filluar. Sipas tij, shumë njerëz gjatë kësaj periudhe përballen me gjumë të ndërprerë, sy të irrituar dhe teshtima të vazhdueshme.
“Kur thithim alergjenë si poleni apo marimangat e pluhurit, sistemi ynë imunitar reagon në mënyrë të tepruar duke liruar histaminë. Kjo shkakton simptoma si bllokim të hundëve, teshtima dhe lotim të syve”, shpjegon ai.
Sipas mjekut, nivelet e histaminës rriten natyrshëm gjatë natës, duke i përkeqësuar simptomat pikërisht në momentin kur përpiqemi të flemë. Ndërkohë, poleni ngjitet lehtë në rroba, flokë dhe çarçafë, duke krijuar një burim të padukshëm irritimi.
Ai shton se edhe përdorimi i një dysheku akupresure ose përtypja e çamçakëzit para gjumit mund të ndihmojë në zbutjen e bllokimit të hundëve.
“Përtypja e çamçakëzit para gjumit mund të ndihmojë në pastrimin e rrugëve të frymëmarrjes dhe në uljen e bllokimit të hundëve, sepse stimulon prodhimin e pështymës dhe gëlltitjen, gjë që mund të ndihmojë në largimin e alergjenëve”, shpjegon ai.
Mendohet se më shumë se 10 milionë njerëz në Mbretërinë e Bashkuar vuajnë nga ethet e barit (hay fever), ndërsa nivelet e polenit nga pemët tashmë kanë filluar të rriten. Më vonë gjatë vitit pritet të rritet edhe poleni i barit.
Një numër i ngjashëm njerëzish vuajnë edhe nga alergjitë ndaj marimangave të pluhurit, të cilat janë ndër shkaktarët kryesorë të irritimeve gjatë gjithë vitit në ambiente të brendshme.
Dr. Mercer sugjeron gjithashtu që pirja e çajit jeshil në mbrëmje mund të ndihmojë, pasi ai përmban antihistaminikë natyralë. Në të kundërt, konsumimi i alkoolit mund t’i përkeqësojë simptomat sepse rrit nivelet e histaminës në organizëm.
Ai rekomandon që njerëzit të fillojnë të “mbrojnë” shtëpinë nga alergjitë sapo të nisë sezoni. Disa hapa të thjeshtë mund të bëjnë ndryshim të madh, si pastrimi më i shpeshtë me fshesë me korrent dhe larja e çarçafëve në temperaturë 60°C, për të reduktuar ekspozimin ndaj polenit dhe pluhurit.
Një tjetër këshillë është të bëni dush para gjumit, në mënyrë që të largoni polenin nga trupi dhe flokët dhe të mos kalojë në jastëk gjatë natës. Gjithashtu rekomandohet që dritaret të mbahen të mbyllura sa më shumë që të jetë e mundur, pasi dritaret e hapura lejojnë hyrjen e polenit në shtëpi.
Sipas ekspertëve, përqendrimi i polenit në ajër është zakonisht më i lartë në orët e mbrëmjes së hershme, gjë që mund të përkeqësojë simptomat.
“Ndryshime të vogla si këto mund të bëjnë një diferencë të madhe për personat që vuajnë nga alergjitë, veçanërisht gjatë periudhave kur poleni është në nivelet më të larta”, përfundon Dr. Mercer.
