Gjatë vitit të rregullt shkollor, nxënësit e këtyre komuniteteve i vijojnë mësimet në disa komuna të Kosovës.
E njëra prej tyre është edhe Komuna e Obiliqit, e cila në bashkëpunim me OJQ-të, përveç shkollimit obligativ, ofron edhe mësim shtesë për nxënësit e komuniteteve.
Është organizata Ballkan Sunfloëer Kosova e cila organizon mësime ditore shtesë në Plemetin.
“Në qendrën tonë që e kemi Ballkan SunFloëers në Plemetin, ndjekin diku 60 fëmijë mësimin që është mësim plotësues- pra, nuk është i rregullt. Plani është i bazuar në kurrikulën e shkollës, ku mësojnë fëmijët me plan-programin e shkollës dhe aty i kemi pesë fusha: Gjuhën, Matematikën, sjelljen, shkencën dhe aktivitetet sportive”, tha Artan Asllani nga kjo organizatë.
Në Drejtorinë e Arsimit në Komunën e Obiliqit thonë se nxënësit e komuniteteve për arsye të ndryshme nuk e vijojnë mësimin në shkollat e Obiliqit.
“Një është që vetë familja e tyre nuk është që në nivelin të edukuar që duhet me pasur një bindje të shëndoshë qe fëmija i tyre mund të jetë i barabartë me gjithë fëmijët e tjerë dhe tjetra arsye është që shumica pjesë e tyre dërmuese sikurse te femrat edhe te meshkujt martohen në moshën e re, dhe i faktor i tretë dominon që gjendja e tyre materiale nuk është e nivelit të duhur”, tha Sahit Zeqiri, drejtor i DKA-së.
Vijueshmëria e nxënësve të komuniteteve nëpër shkolla, shihet të jetë jo e madhe.
“Në Kosovë me mbi 84% e, komuniteteve rom, ashkali,egjiptian, e vijojnë shkollimin fillor në krahasim me 96% të komuniteteve të tjera,përderisa në shkollimin e mesëm të ulët 64% e fëmijëve të komuniteteve vazhdojnë ciklin e mesëm të ulët, mirëpo fatkeqësisht vetëm 59% e tyre e përfundojnë shkollimin e mesëm të ulët”, tha Bajram Ilazi nga OJQ “Zëri i Romëve, Ashkalive dhe Egjiptianëve”.
Sipas kësaj organizate, Ministria e Arsimit nuk po bën mjaftueshëm për ta rritur numrin e këtyre nxënësve nëpër shkolla.
Javë më parë, kryeministri i Kosovës, Albin Kurti ka mbajtur takim me përfaqësuesit e komuniteteve, ku ka premtuar punësim dhe ndarje të bursave për nxënësit e të gjitha komuniteteve.
Raporti i gazetares Besiana Visoka.
