Kryetari i Prishtinës, Përparim Rama, ka bërë thirrje për qytetarët që të dielën, më 12 tetor, të votojnë për ata që kanë punuar dhe zhvilluar qytetin, duke shmangur “eksperimentet dhe shpëtimtarët që shfaqen çdo katër vjet”.
Rama tha se zgjedhjet e ardhshme janë një mundësi për të vendosur mes atyre që ndaluan projektet dhe atyre që ndërtuan ura, mes atyre që flasin për qytetin dhe atyre që punojnë për qytetin çdo ditë.
Ai theksoi se Prishtina ka nevojë për besim, stabilitet, vazhdimësi dhe punë konkrete, jo për ide që dështuan më parë.
“Prishtina është në duar të sigurta. Kemi vizion, plan dhe energjinë për ta çuar qytetin përtej çdo pengese dhe çdo kufiri të vendosur më parë. Të dielën, votojmë për një punë që nuk është ndalur asnjë ditë, për një vizion që e di se si ta përfundojë. Bashkë për fitoren e madhe, bashkë për Prishtinën që ecën përpara!”, tha Rama. /teve1.info/
