Në kuadër të operacioneve policore për armëmbajtje pa leje, numër i madh i tyre konfiskohen.
Shifra të larta kanë arritur të konfiskojnë edhe për shtatë muaj të këtij viti.
“Numri i armëve të konfiskuara është 636; kurse numri i municionit të konfiskuara është 9531”, bën të ditur Policia.
Me strategji kombëtare dhe plan veprimi, ka dalë Ministria e Brendshme për armë të vogla, të lehta dhe eksplozivë.
Kjo parashihet për periudhën 2023-2027, me qëllim të përmirësimit të gjendjes në parandalimin dhe luftimin efikas të keqpërdorimit të armëve.
Në këto pesë objektiva strategjik është fokusuar strategjia kombëtare:
“Zhvillimi i mëtutjeshëm i legjislacionit dhe politikave të garantohet miratimi i legjislacionit për kontrollin e Armëve të Vogla, të Lehta dhe Eksplozivëve; Qasje gjithëpërfshirëse për zvogëlimin e rreziqeve nga AVLE-të që cenojnë sigurinë dhe rendin publik; Zhvillimi i kapaciteteve institucionale në fushën e AVLE-ve; Të zvogëlohet ndjeshëm numri i përllogaritur i AVLE-ve të poseduara ilegalisht, oferta, kërkesa dhe keqpërdorimi i tyre, përmes rritjes së ndërgjegjësimit, edukimit dhe aktiviteteve të bashkëpunimit; Reduktimi sistematik i tepricave dhe shkatërrimi i AVLE-ve të konfiskuara, si dhe zvogëlimi i rrezikut të përhapjes dhe devijimit të tyre”, njofton Ministria e Brendshme.
Përmbushja e këtyre objektivave planifikohet të pasqyrohet përmes raporteve gjashtë mujore dhe raporteve vjetore.
Si çështje pozitive, njohësi i sigurisë, Bedri Elezi, e vlerëson shtimin e kompetencave të disa institucioneve në kuadër të sigurisë kombëtare.
Të gjitha këto veprime janë rekomanduar si rezultat i vlerësimit të situatës aktuale në vend dhe në kontekst rajonal e global në raport me përdorimin e armëve.
