Skena të tmerrshme dhune pushtuan Athinën mbrëmjen e së hënës në stadiumin e AEK-ut. Ultrasit e Dinamo Zagrebit sulmuan tifozët e AEK-ut. Për pasojë ka humbur jetën një 22-vjeçar grek. Ai u vra nga plagët me thikë.
Policia ka arrestuar në lidhje me këtë ngjarje 98 persona. Mes tyre janë 87 kroatë, një shqiptar, një austriak, një boshnjak, një gjerman dhe pesë grekë.
Po ashtu nga ngjarja kanë mbetur tetë persona të plagosur. Mes tyre një 17-vjeçar që ka goditje të forta në kokë pasi u godit me gurë. Në spital ndodhen të shtruar edhe 3 grekë e 5 kroatë të tjerë.
Skenat e dhunës ndodhën përpara ndeshjes AEK-Dinamo Zagreb, që është pritur të luhet këtë të martë për fazën e eliminatoreve të Champions League, mirëpo UEFA shkak terrorit të ndodhur në Athinë ka vendosur ta shtyjë ndeshjen, e cila mund të zhvillohet të premten e 18 gushtit ose të shtunën e 19 gushtit varësisht siç bien skuadrat në dakordim me instancat e larta te UEFA-së.
Siç shkruajnë mediat greke, tifozët kroatë kanë mbërritur të organizuar në Athinë, pavarësisht një vendimi të UEFA-s për t’i ndaluar ata të lëvizin në transferta.
Kur kanë shkuar në Athinë, ata janë shoqëruar me tifozë të Panathinaikos, skuadër tjetër greke.
22-vjeçarin e gjetën të vrarë me thikë dhe ishte i mbuluar me gjak. Ndërkohë një kroat ishte po ashtu i mbuluar me gjak në gjendje të rënduar. Autoritetet greke vijojnë hetimet për këtë ngjarje.