Policia e Kosovës ka arrestuar të dielën një person në Skenderaj pas raportimeve për një përleshje që kishte ndodhur në një lokal në Polac të kësaj komune.
Incidenti ka ndodhur rreth orës 09:00 dhe raportohet se një person ka pësuar lëndime dhe fillimisht është dërguar në emergjencë në Skenderaj për tretman mjekësor e më pas Spitalin Rajonal në Mitrovicë, ku sipas mjekëve lëndimet janë të natyrës së lehtë.
Pas tretmanit mjekësor, personi është intervistuar pasi që kishte qenë edhe i dyshuari në këtë rast.
Një armë e llojit pistoletë dhe një karikator me gjashtë fishekë janë konfiskuar në vendin e ngjarjes, të cilat i përkisnin personit të dyshuar.
Gjithashtu në vendin e ngjarjes janë gjetur dhe konfiskuar edhe dy gëzhoja dhe një predhë.
Njësitë kompetente kanë ekzaminuar vendin e ngjarjes, kanë intervistuar dëshmitarët dhe kanë ndërmarrë veprimet e nevojshme hetimore në lidhje me rastin.
Me urdhër të prokurorit kujdestar ndaj të dyshuarit I.L. (48), shtetas i Kosovës, iniciohet rasti për veprat armëmbajtje pa leje dhe përdorim i armës apo mjetit të rrezikshëm dhe ndaj tij është caktuar masa e ndalimit policor 48 orë.
