Autori: Jona Kelmendi
Zhurma e armëve të zjarrit u dëgjua në orët e para të mëngjesit në fshatin Doganaj të Ferizajit.
Në këtë përleshje u përfshin katër persona, njëri nga ta zyrtar policor, që ishte jashtë detyrës zyrtare.
Ky i fundit dhe një qytetar kanë mbetur të plagosur.
Fillimisht të dy janë pranuar në Qendrën Emergjente në Ferizaj.
E me pas nga aty, të plagosurit janë transferuar në Qendrën Klinike Universitare të Kosovës për një trajtim të mëtejmë mjekësor.
Naser Syla mjek kujdestar në QKUK konfirmoj për televizionin se dy të lënduarit kanë marrë plagë nga armë zjarri dhe se njëri është dërguar në klinikën e kirurgjisë torakale, ndërsa tjetri në klinikën e ortopedisë.
Megjithatë gjendja e tyre është stabile.
Sipas Inspektoratit Policor të Kosovës, në bazë të hetimeve fillestare ngjarja dyshohet të ketë nisur si një mosmarrëveshje në trafik, që më pas përfundoi në një incident të gjuajtjes me armë.
“Në vendin e ngjarjes janë sekuestruar dy vetura, dy armë zjarri – njëra armë zyrtare revole e llojit Glock 19, një revole Zastava, 16 gëzhoja dhe një predhë.
Pas kontakteve me Prokurorinë Themelore në Ferizaj e cila është njoftuar për të gjitha veprimet fillestare hetimore, janë arrestuar katër të dyshuar (zyrtari policor dhe tre qytetarë të dyshuar) kurse të njëjtëve me vendim të prokurorisë u është caktuar masa e ndalimit për 48 orë.Bazuar në autorizimet ligjore, Inspektorati Policor i Kosovës i ka rekomanduar Policisë së Kosovës edhe suspendimin e zyrtarit policor të përfshirë në këtë rast”, thuhet në komunikatën e IPK-së
Prokuroria Themelore në Ferizaj ka sqaruar veprimet e ndërmarra ndaj katër të arrestuarve.
“Prokuroria Themelore ne Ferizaj, njofton opinionin publik se me vendim te Prokurorit të Shtetit të Departamentit te Krimeve të Rënda, ka ndaluar ne kohezgjatje prej 48-orësh, kater (4) persona te dyshuar me inicialet: A.S., L.V., Sh.L., dhe L.K., per shkak të dyshimit te veprave penale “Vrasja ne tentative”,”Mbajtja ne pronesi, kontroll ose posedim të paautorizuar të armëve”, “Shkaktimi i rrezikut të pergjithshëm” dhe “Pjesëmarrja ne rrahje” sipas Kodit Penal te Republikes se Kosoves”, thuhet në komunikatën e Prokurorisë.
Hetuesit e IPK-së në konsultim të vazhdueshëm me prokurorin përgjegjës dhe njësit e tjera policore pritet të ndërmarrin edhe veprime të tjera hetimore lidhur me këtë rast për të sqaruar rrethanat e këtij incidenti.
