21 tifozë janë shoqëruar në Polici pas incidentit ndërmjet tifozëve në ndeshjen e Superligës së Kosovës në futboll ndërmjet Llapit dhe Ballkanit të zhvilluar në Podujevë të dielën.
Nga këto përleshje të lënduar kanë mbetur edhe dy pjesëtarë të Policisë së Kosovës dhe tre tifozë, ka bërë të ditur për teve1.info zëdhënësja e PK-së për rajonin e Prishtinës, Flora Ahmeti.
“Shoqërohen në stacion policor 21 persona të përfshirë në një incident të ndodhur në Podujevë Me datën 12.03.2023, rreth orës 15:00, në Podujevë, pas një ndeshje futbolli, tifozët e ekipeve janë përleshur duke përdorë/gjuajtur mjete të forta. Si pasojë e përleshjes deri tani është raportuar se janë lënduar 2 zyrtarë policor, të cilët ishin në detyrë, të angazhuar për menaxhimin e situatës. Ndërsa nga ana e tifozëve, deri tani është raportuar për tre të lënduar”, ka thënë Ahmeti.
Ajo ka bërë të ditur se si pasojë e përleshjes e cila kishte nisur në stadiumin e Llapit ajo ka vazhduar edhe në rrugë, ku janë shkaktuar edhe dëme materiale.
“Bazuar në të dhënat fillestare, ngjarja ka filluar në stadium, ku janë shkaktuar dëme materiale, (dëmtim i ulëseve), më pas ka vazhduar në rrugët “Besnik Restelica” dhe “Zahir Pajaziti”, ku janë dëmtuar tri vetura dhe një autobus. Pas vënies nën kontrollë të situatës, policia në koordinim me prokurorin e shtetit, kanë nisë një hetim për ngjarjen. Hetuesit policor në vazhdimësi janë duke ndërmarrë veprime hetimore me qëllim të identifikimit dhe procedimit e të gjithë të dyshuarve të përfshirë në këtë ngjarje”, ka thënë Ahmeti.
Ndeshja Llapi- Ballkani e vlefshme për xhiro së 25 në kuadër të Superligës së Kosovës në futboll, ka përfunaur me fitore të Llapit me rezultat 3:2
