Edon Zhegrova është rikthyer të mërkurën me pjesën tjetër të grupit në stërvitje para duelit të fundit të këtij viti që Juventusi e luan në udhëtim kundër Pisas.
Zhegrova mungoi në stërvitjet e fillimit të kësaj jave pasi u ndal nga gripi, por futbollisti i Kosovës pritet të jetë gati për duelin e së shtunës mbrëma.
Mbetet të shihet nëse Zhegrova do të jetë startues, duke pasur parasysh situatën e tij me grip, megjithatë ai pritet të ketë minuta në këtë përballje.
Sulmuesi i krahut, e ka vetëm një ndeshje si startues te Juventusi, dhe atë kundër ekipit nga Qipro, Pafos në kuadër të Ligës së Kampionëve, ku u aktivizua përgjatë pjesës së parë.
Deri më tani, Zhegrova në total ka 10 paraqitje në të gjitha garat me fanellën e Juventusit apo thënë ndryshe ka luajtur vetëm 174 minuta.
26-vjeçari para fillimit të këtij sezoni iu bashkua Juventusit nga Lille për 20 milionë euro dhe me ekipin italian ka kontratë deri në verën e vitit 2030.
