Konsiderohet si truri i lëvizjes paqësore.
E kontributi i tij i paharrueshëm për lirinë dhe pavarësinë e vendit, u përkujtua këtë të martë, në 26 vjetorin e ekzekutimit të tij nga forcat serbe.
Veprimtarin e shquar, Fehmi Agani, e kujton me mall nënkryetari i Lidhjes Demokratike të Kosovës, Lutfi Haziri.
Ai thotë se emri i Aganit lidhet me proceset me të rëndësishme nëpër të cilat ka kaluar Kosova.
“Fehmi Agani është humbje e madhe për Kosovën. Fehmi Agani ka ndërtuar mendim politik. Gjithçka që lidhet prej deklaratës së pavarësisë së Kosovës, zgjedhjeve, referendumit, kushtetutës së Kaçanikut dhe proceseve të mëdha në unifikim të faktorit shqiptar e mban emrin e Fehmi Aganit” , ka thënë Haziri për Tëvë1
Ai shprehet i zhgënjyer që edhe pas më shumë se dy dekadash nuk ka drejtësi për vrasjen e Aganit.
“Ekzekutimi i profesor Fehmi Aganit në ditët e luftës në Kosovë ka qenë hakmarrja më e madhe që iu është bë rezistencës politike të Ibrahim Rugovës dhe shqiptarëve në përgjithësi. Është e dhimbshme dhe për keqardhje që akoma nuk ka drejtësi për vrasjen e Aganit” , thotë ai.
Fehmi Agani ishte një nga bashkëthemeluesit e Lidhjes Demokratike të Kosovës dhe një nga figurat më të rëndësishme të rezistencës paqësore ndaj regjimit serb gjatë viteve të 90-ta.
