Komuna e Prishtinës ka njoftuar se do të ketë pezullim të përkohshëm të transportit publik, kjo pasi gjatë ditëve në vijim pritet të ketë përkeqësim të kushteve atmosferike me temperatura të ulëta, ngrica dhe reshje bore.
Komuna bëri të ditur se në disa linja të transportit urban mund të ketë vonesa e në disa zona “ku vlerësohet rrezik për qarkullim të sigurt”, transporti publik do të pezullohet përkohësisht deri në normalizimin e kushteve.
Ndërkohë, komuna ka thënë se për çdo rast të tillë, qytetarët do të njoftohen me kohë.
Postimi i plotë:
Njoftim për qytetarët
Gjatë ditëve në vijim pritet përkeqësim i kushteve atmosferike, me temperatura të ulëta, ngrica dhe reshje bore. Ju lutemi për kujdes të shtuar gjatë qarkullimit.
Rekomandohet:
- të kufizoni lëvizjet vetëm në raste të domosdoshme,
- të përdorni pajisjet e detyrueshme të dimrit,
- të shmangni shpejtësinë e lartë dhe të respektoni sinjalistikën në terren.
Transporti Publik Urban
Si pasojë e kushteve atmosferike, mund të ketë vonesa në disa linja. Në zonat ku vlerësohet rrezik për qarkullim të sigurt, transporti publik do të pezullohet përkohësisht deri në normalizimin e kushteve; për çdo rast të tillë, qytetarët do të njoftohen me kohë.
Qendra e Thirrjeve
Për çdo pengesë në qarkullim apo situatë që kërkon ndërhyrje, qytetarët mund të kontaktojnë në:
0800 122 33 ose 0800 122 44
Faleminderit për bashkëpunimin dhe mirëkuptimin.
