Shtabi Emergjent Komunal për menaxhim e situatës së krijuar nga reshjet e fundit ka vlerësuar se pas gjendjes aktuale ka vendosur që të hiqet gjendja e situatës emergjente në Komunën e Malishevës.
Pavarësisht kësaj, kjo komunë ka bërë të ditur se shërbimet emergjente mbesin në gatishëmri të shtuar.
Kryetar i Komunës së Malishevës, Ekrem Kastrati ka theksuar se situata ka qenë emergjente dhe është përcjell me dëme të mëdha.
“Përfundon gjendja e situatës emergjente në Komunën e Malishevës. Ky vendim është marrë sot, pas mbledhjes së Shtabit Emergjent dhe vlerësimit të situatës në terren. Sipas të dhënave zyrtare, niveli i ujërave ka rënë dhe gjendja aktuale është stabile. Gjatë kësaj mbledhjeje, Kryetari i Komunës së Malishevës, Ekrem Kastrati, së bashku me anëtarët e Shtabit Emergjent, ka theksuar se situata ka qenë emergjente dhe është përcjellë me dëme të mëdha, veçanërisht në infrastrukturë, ekonomi familjare, biznese dhe prona private.Po ashtu, Kryetari Kastrati ka bërë të ditur se tashmë është formuar Komisioni për Vlerësimin e Dëmeve, ndërsa ka ftuar të gjithë qytetarët e dëmtuar që të parashtrojnë kërkesat për vlerësim të dëmeve pranë Zyrës së Pritjes në Komunën e Malishevës. Në përfundim të mbledhjes, Kryetari i Komunës, Ekrem Kastrati, në emër të Shtabit Emergjent dhe në emrin e tij personal, ka falënderuar në mënyrë të veçantë të gjitha ekipet emergjente dhe institucionet e angazhuara për përkushtimin dhe angazhimin e treguar gjatë menaxhimit të kësaj situate”, ka njoftuar komuna./teve1.info/
