Ministria e Arsimit, Shkencës, Teknologjisë dhe Inovacionit (MAShTI) ka njoftuar se pjesa e parë e Provimit të Maturës Shtetërore është përmbyllur me sukses.
Procesi është vlerësuar si i organizuar dhe i administruar në mënyrë të rregullt, pa ndonjë pengesë të theksuar gjatë zhvillimit të tij.
Testimi është zhvilluar në gjithsej 158 qendra të testimit, ku maturantët janë shpërndarë në 1335 salla. Sipas raporteve të komisionerëve, provimi ka nisur me kohë dhe është zhvilluar në kushte të qeta dhe të përshtatshme për nxënësit.
Megjithatë, MAShTI ka bërë të ditur se një numër i konsideruar nxënësish janë larguar nga testimi për shkak të përdorimit të telefonave gjatë provimit, duke theksuar rëndësinë e respektimit të rregullave për të ruajtur integritetin e procesit.
“Për shkak të përdorimit të telefonave kësaj radhe janë larguar një numër i konsideruar i nxënësve. Një raport më i detajuar për procesin do të bëhet publik javën e ardhshme, pas analizimit të raporteve nga kryetarët e qendrave të testimit”, thuhet në njoftim.
Një raport më i detajuar mbi ecurinë e provimit pritet të publikohet javën e ardhshme, pasi të analizohen raportet e kryetarëve të qendrave të testimit.
MAShTI ka shprehur falënderim për të gjithë akterët e përfshirë në mbarëvajtjen e këtij procesi të rëndësishëm arsimor.
