Në Qendrën e Numërimit dhe Rezultateve ka përfunduar procesi i numërimit të fletëvotimeve të ardhura nga përfaqësitë diplomatike të Kosovës në mbarë botën.
Sipas rezultateve të publikuara në platformën zyrtare të Komisionit Qendror të Zgjedhjeve (KQZ), Lëvizja Vetëvendosje ka dalë fituese bindëse me 86.74 për qind të votave, që përkthehen në 13,899 vota.
Partia Demokratike e Kosovës është renditur e dyta me 6.07 për qind apo 973 vota, ndërsa Lidhja Demokratike e Kosovës ka siguruar 4.76 për qind, përkatësisht 762 vota.
Aleanca për Ardhmërinë e Kosovës ka marrë 1.59 për qind ose 255 vota, Nisma 0.22 për qind apo 36 vota, ndërsa Partia Demokratike Turke e Kosovës (KDTP) ka siguruar 0.17 për qind, që përbëjnë 28 vota.
