Komisioni Qendror i Zgjedhjeve, njoftoi se tashmë ka përfunduar afati i aplikimit për pjesëmarrje në zgjedhjet e 23 prillit në veri.
Njëherit, kanë bërë të ditur se gjatë periudhës 14 ditore të aplikimit, KQZ nuk ka pranuar asnjë aplikim nga ndonjë subjekt politik.
“Përfundon afati për aplikim për pjesëmarrje në zgjedhjet e 23 prillit Prishtinë, 22 mars 2023, 16:00 – Komisioni Qendror i Zgjedhjeve njofton se është përmbyllur afati për aplikim për certifikim të subjekteve politike dhe kandidatëve që duan të marrin pjesë në zgjedhjet e jashtëzakonshme për kryetar në komunat: Mitrovicë e Veriut, Zveçan, Zubin Potok dhe Leposaviq dhe në zgjedhjet e parakohshme për kuvendet komunale: Zveçan dhe Leposaviq, të cilat do të mbahen më 23 prill 2023. Gjatë periudhës 14 ditore të aplikimit (09 mars – 22 mars 2023), KQZ-ja nuk ka pranuar ndonjë aplikim nga ndonjë subjekt politik”, thuhet në komunikatë.
Njëherit, Komisioni Qendror i Zgjedhjeve ka dhënë njoftim shtesë për ecurinë e aplikimit.
“Njoftim shtesë: Nga 9 deri më 13 mars 2023, subjektet politike dhe kandidatët e certifikuar në nëntor dhe dhjetor të vitit 2022, për pjesëmarrje në zgjedhjet e 18 dhe 25 dhjetorit, kanë konfirmuar certifikimin e mëhershëm dhe të njëjtit nuk kanë pasur nevojë të paraqesin aplikim nga fillimi, me përjashtim të udhëzimeve të dhëna nga Zyra për Regjistrim, Certifikim dhe Kontroll Financiar të Subjekteve Politike”, kanë shkruar tutje.
Kujtojmë se dje në një deklaratë për media, Lista Serbe ka deklaruar që nuk do të kandidojnë në zgjedhjet e 23 prillit në Veri, pasi, sipas tyre, nuk iu janë plotësuar kushtet për të cilat kanë lëshuar institucionet./teve1.info/.
