Inspektorati Policor i Kosovës ka njoftuar se një zyrtar policor është suspenduar nga puna, për shkak se i njëjti është përfshirë në një mosmarrëveshje fizike.
Sipas njoftimit, thuhet se rasti ka ndodhur pas një aksidenti trafiku të ndodhur mbrëmë, ku pas njoftimit të Policisë, palët me këtë rast edhe zyrtari policor i cili thuhet se ka qenë jashtë detyrës është përfshirë në një mosmarrëveshje fizike me palën tjetër.
“Sipas informacionit të pranuar palët e përfshira në këtë aksident nuk kanë arritur të gjejnë mirëkuptim lidhur me mënyrën e procedimit dhe për këtë arsye e kanë njoftuar policinë. Në ndërkohë (para se të arrinte njësia e patrullës policore) si rezultat i fjalosjes dhe mosmarrëveshjeve dyshohet se nga dy të dyshuar (përfshirë këtu zyrtarin policor jashtë detyrës zyrtare) është sulmuar njëra palë e përfshirë në këtë aksident”, thuhet në njoftim.
Bëhet e ditur se pas veprimeve hetimore me dyshimin se kanë kryer veprën penale “Sulm” nga IKP-ja, janë arrestuar dy të dyshuar, teksa si pjesë e procedurës penale zyrtari policor është suspenduar nga puna.
“Pas këtyre veprimeve hetimore me dyshimin se kanë kryer veprën penale “Sulm” nga IPK janë arrestuar dy të dyshuar (përfshirë edhe zyrtarin policor) ndaj të cilëve prokurori ka lëshuar aktvendim për ndalim për 48 orë.Si pjesë e procedurës administrative hetimore zyrtari policor është suspenduar nga puna. Veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente”, thuhet tutje./teve1.info./
