Në punimet e sesionit të Asamblesë, Kiljunen ka thënë se është i vetdijshëm për sfidat që i ka ky proces përpara.
“E di që Këshilli i Ministrave ende pret të gjejë një pëlqim për të kërkuar mendimin tonë për këtë çështje dhe e mbështes fuqishëm idenë që duhet të kemi dhe të hapim debat, diskutim për anëtarësimin e Kosovës. Dhe padyshim që do ta mbështes Kosovën që të bëhet anëtarja e 47-të e kësaj organizate”, ka thënë ai.
Kiljunen ka shtuar se anëtarësimi në këtë organizatë nuk ka të bëjë vetëm me çështjen e të drejtës për sovranitet.
“Nuk bëhet fjalë vetëm për çështjen e të drejtës për sovranitet të të gjitha vendeve, duke përfshirë edhe vendet e vogla. Unë po vij, zonja Presidente, nga Finlanda, kështu që kjo është një çështje shumë e rëndësishme për mua”, ka shtuar ai.
Finlandezi ka thënë që është në dijeni edhe për diskutimet që bëhen për statutin e Kosovës, por se anëtarësimi në CoE është më shumë se kaq.
“Por nuk është vetëm çështja e statutit të Kosovës e cila është paksa e diskutueshme siç e dimë sa i përket opinioneve në Evropë. Nuk është e diskutueshme nga këndvështrimi im, por për sa i përket diskutimit. Por bëhet fjalë për të drejtën e qytetarëve të Kosovës që të kenë qasje në këtë organizatë, në institucionet e saj, dhe në veçanti në Gjykatën e të Drejtave të Njeriut që ekziston këtu”, ka shtuar Kiljunen.
“Ne tashmë e kemi përdorur atë lloj argumenti më herët kur kemi marrë parasysh pjesëmarrjen e mundshme të disa vendeve të tjera në këtë organizatë. Kjo është kryesisht çështje e të drejtave të qytetarëve të kenë mundësi ta kenë fjalën e tyre ndaj të drejtave të njeriut, demokracisë dhe gjithashtu sundimit të ligjit. Vlerat që trajtojmë”, ka shtuar finlandezi.
Ndryshe, Kosova ka aplikuar për anëtarësim në Këshillin e Evropës në vitin e kaluar.
