Përfaqësues politikë dhe institucionalë shqiptarë të Komunave të Luginës së Preshevës kërkuan që Lugina e Preshevës të jetë në fokus të politikave transatlantike perëndimore me përkrahjen e Qeverisë së Kosovës dhe asaj të Shqipërisë.
Ata përmes nënshkrimeve kanë ftuar institucionet e Kosovës dhe Shqipërisë të angazhohen në mbrojtjen e interesave të shqiptarëve të Luginës në përputhje me referendumin e 1 dhe 2 marsit 1992, për autonomi politike territoriale me të drejtë bashkimi me Kosovën.
Deputeti shqiptar i Parlamentit serb, Shaip Kamberi ka thënë se shqiptarët e Luginës së Preshevës nuk duhet të jenë pakica e vetme e cila përtej përpjekjeve sipas tij, vazhdojnë të stagnojnë në realizimin e të drejtave të tyre.
Kamberi në Facebook tha se rrugëtimi i vendeve të rajonit drejtë BE-së bëhet më i lehtë vetëm nëse pakicat trajtohen në mënyrën e merituar e në përputhje me standardet evropiane.
Teksa tha se duhet angazhim i përbashkët në mënyrë që të drejtat e shqiptarëve të Luginës të realizohen në tërësi.
Madje ai theksoi se dialogu Kosovë -Serbi është mundësia më e mirë që kjo temë të trajtohet.
“Prandaj na duhet angazhim i përbashkët e koordinim i shpeshtuar në mënyrë që çështja e Luginës të trajtohet e të drejtat e shqiptarëve të realizohen në tërësi. Dialogu Kosovë -Serbi është mundësia më e mirë që kjo temë të trajtohet”, tha ai./teve1.info
