Një nga shqetësimet kryesore në vend, mbetet të jetë përdorimi i substancave narkotike, sidomos i asaj të llojit marihuanë, nga nxënësit e shkollave fillore dhe të mesme në Kosovë.
Andaj për këtë edhe institucionet e sigurisë janë fokusuar në parandalimin e kësaj dukurie me ndërmarrjen e disa veprimeve shtesë.
Drejtori i Anti-drogës në Policinë e Kosovës, thotë se për këtë kanë hartuar edhe plane operative me akterë tjerë që kanë fokus këtë veprimtari.
“Kemi angazhuar hetues, polic civilë, polic në forma të ndryshme të cilët shkojnë dhe vizitojnë shkollat, operojnë apo patrullojnë rreth shkollave, tani kemi edhe policët e lagjeve të cilët përkujdesen në afërsi të shkollave dhe bashkëpunojnë edhe me shkollat. Në përgjithësi në shkolla në aspektin e parandalimit ne kemi bërë shumë aktivitete në këtë drejtim. Natyrisht, situata nuk është aq alarmante sa për t’u shqetësuar në kuptimin e përgjithshëm, por sido që të jetë ne e marrim si temë shumë të rëndësishme”, ka thënë Murseli.
Murseli tregon se me punën e hetuesve të tyre në teren është arritur të parandalohet futja në shkolla e kësaj substance.
“Në afërsi të shkollave kemi pasë raste kur kemi gjetë persona të cilët iu kanë gjetë sasi e drogës dhe kemi dyshuar se ata e keqpërdorin moshën e fëmijëve, nxënësve që janë në shkolla, brenda shkollave nuk ka shumë raste ao mund të themi se nuk jam i informuar se ka ndonjë rast i cili është gjetë dikush brenda shkollës duke konsumuar substanca narkotike. Ne kemi pasë raste që kemi bashkëpunuar me shkollën dhe ata kanë identifikuar nxënësit dhe kemi gjetë sasi të drogës që e ka pasë në trup por jo në përdorim”, është shprehur tutje Murseli.
E vetëm gjatë këtij viti në Qendrën “Labyrinth” janë trajtuar 27 të rinj nën moshën 18-vjeçare, numër në rritje nga vitet paraprake.
“Shqetësimi ose rreziku, grupmosha më e rrezikume e të rinjve është 15,16,17 vjeç. Këto janë shumë të aktuar ose të cenueshme për fillimin e përdorimit të drogës të tipit marihuanë. Këto raste na vijnë shpesh edhe me referim nga Qendrat për Punë Sociale”, ka thënë Blakaj.
Sipas tij, shqetësuese mbetet tendenca për rritjen e përdorimit nga këto grupmosha.
“Grupet kriminale po i përdorin të miturit për trafikim të drogës, në këtë rast kuptohet që këta kalojnë shumë më lehtë sa i përket sanksioneve të parapra me ligj dhe poi abuzojnë poi keqpërdorin duke i future në rrjetet e shpërndarjes së drogës. Edhe nëse nxinen pra dënimet edhe si të mitur janë shumë më të buta, e kështu me radhë”, është shprehur tutje Blakaj
Muajve të fundit, njësia e Anti-drogës ka intensifikuar aksionet ku ka pasur një sasi të konsiderueshme të sekuestrimit të substancave narkotike.
