Pas Ligës së Kampionëve, sonte do të zhvillohen edhe ndeshjet e para çerekfinale të Ligës së Evropës. Prej orës 21:00, zhvillohen të katër ndeshjet e kësaj faze, ndërsa do të kemi përballje tejet interesante.
Një prej dueleve të forta të mbrëmjes do të jetë edhe derbi i skuadrave nga Serie A e Italisë, Milanit dhe Romës. Ndeshja e parë çerekfinale mes ekipeve italiane zhvillohet në stadiumin “San Siro” kurse Milani vlerësohet favorit ndaj Romës bazuar në renditjen aktuale në Serie A.
Edhe përballja mes Bayer Leverkusenit dhe West Ham Unitedit, pritet të jetë shumë interesante për faktin se të dy ekipet e synojnë suksesin në këtë garë të UEFA-s. Leverkuseni i Granit Xhakës këtë sezon ka treguar formë fantastike pasi ende nuk di humbje në asnjërën prej garave në të cilat paraqitet.
Në Bundesligë, Leverkuseni është favoriti kryesor për titullin e kampionit, ndërsa ka siguruar edhe finalen e Kupës së Gjermanisë. Në anën tjetër, West Hami edicionin e shkuar triumfoi në Ligën e Konferencës dhe sigurisht se këtë edicion po e kërkon suksesin në Ligën e Evropës.
Një prej skuadrave favorite këtë edicion në Ligën e Evropës, Liverpooli luan në shtëpi ndaj Atalantas kurse dueli i fundit çerekfinale është ai ndërmjet Benficas dhe Marseillet.
Krahas Ligës së Evropës, do të zhvillohet edhe çerekfinalet e para të Ligës së Konferencës. Në orën 18:45 luajnë Olympiacos – Fenerbahçe dhe Viktoria Plzen – Fiorentina, ndërsa në orën 21:00 do të përballen Aston Villa – Lille e Club Brugge – PAOK.
