Liberalizimi i tregut të energjisë elektrike i përballi në gjykatore.
Padia e Odës Ekonomike të Kosovës ndaj Zyrës së Rregullatorit të Energjisë Elektrike për liberalizimin e tregut të energjisë, u bë subjekt shqyrtimi në Gjykatën Supreme.
Në seancën e së mërkurës, palët dhanë qëndrimet e tyre në lidhje me padinë.
Përfaqësuesi i Odës, tha se në thelb nuk e kundërshtojnë liberalizimin e tregut të energjisë, por mënyrën e zhvillimit të këtij procesi.
“Jo se e kanë kundërshtuar procesin e liberalizimit të tregut të energjisë elektrike, por mes tjerash kanë potencuar nevojën e një faze transitore për të ardhur deri tek ky proces. Kanë qenë të papërgatitur për një ndryshim radikal me efekte gati se shkatërruese për ekonominë vendore”, tha avokati Ekrem Hoxha.
Madje sipas Hoxhës, ZRRE-ja qëllimshëm shmangu detyrimet e saj ligjore në lidhje më këtë proces.
“Ka pasur obligim dhe detyrim ligjor të kryejë analizë të konkurrencës reale në sektorin e energjisë elektrike. Këtë nuk e ka bërë dhe nuk e ka bërë me vetdije të plotë, duke shmnagur detyrimin ligjor për të bërë favore ekonomike për një operator privat si KESCO dhe disa operator tregtar të tjerë të licensuar së fundi, për të komufluar kinse konkurrencën reale”, u shpreh ai.
Të gjitha argumentet e OEK për Zyrën e Rregullatorit të Energjisë ishin të pabazuara.
Përfaqësuesi ligjor i ZRRE-në në fjalën e tij kundërshtoi përmbajtjen e plotë të padisë.
“ZRRE kundërshton në tërësi padinë dhe kërkesë-padinë e OEK, si të pabazuar në ligj dhe në fakte. Gjitha faktet e kontestuara janë nxjerrë në zbatim të drejtpërdrejt të kompetencave ligjore të ZRRE-së, të përcaktuar nga ligji për ZRRE dhe ligji për energjinë elektrike”, tha Ymerdin Misini.
Sipas tij, gjitha veprimet e ZRRE-së janë bazuar në ligjin për rregullatorin e energjisë.
“ZRRE ka për detyrë të krijojë një treg të brendshëm, konkurrues dhe të garantojë furnizim të qëndrueshëm dhe jo diskriminues për konsumatorët. Po ashtu, neni 51 i këtij ligji, parashikon që ZRRE mund të vendosë obligimet e shërbimit publik mbi ndërmarrjet e energjisë në mënyrë transparente dhe jo diskriminuese, duke ruajtuar hapjen e tregut. Këto dispozita përbëjnë bazën e ligjshme mbi të cilat është mbështetur udhëzuesi për liberalizim dhe aktet tjera përkatëse”, u shpreh Misini.
Vendimi i Gjykatës Supreme lidhur me këtë padi, pritet të bëhet në ditët në vijim.
