Ministrja e Industrisë, Ndërmarrëse dhe Tregtisë, Rozeta Hajdari është përplasur me deputeten e LDK-së, Hykmete Bajrami për rezervat shtetërore.
Ministrja Hajdari tha se nuk është mirë të spekulohet dhe shpifet për rastin e rezervave shtetërore.
“Për rastin e rezervës shtetërore gjatë mandatit tim më së miri flet vendimi i Gjykatës së Apelit dhe Gjykatës Supreme, prandaj nuk është mirë të spekulohet me fjalë dhe shpifje kur nuk kanë gjetur asnjë vepër penale tek zyrtarët e ministrisë… E sa i përket zhdukjes së mëhershme të rezervave shtetërore ne ende jemi në luftë me operatorin ekonomik përmes avokaturës së shtetit le të flet ish-ministrja deputetja Hykmete që janë paguar, por ne nuk e pranojmë atë çmim që është paguar me vonesë“, tha ajo, raporton kp.
E deputetja e Lidhjes Demokratike të Kosovës, Hykmete Bajrami tha se rezerva shtetërore po vazhdon të konsiderohet sekret. Ajo tha se “Më 2019 janë zhdukur, nuk jam përgjegjëse për atë kohë…”
“Oj ministre çka me fol unë, pse nuk po fol me kryetaren e grupit parlamentar, Mimoza Kusari në kohën e të cilës është bërë kontrata. Unë kontratën ia dorëzova kryeministrit, Albin Kurti. Ti e ke kontratën në MINT aty është njoftimi kur në kohën e Mimoza Kusarit i bëhet kërkesë KRPP-së me nënshkrua kontratë me Universal Food… Në 2019 janë zhdukur nuk jam përgjegjëse në ministri në vitin 2019 kemi qenë bashkë në opozitë me Lëvizjen Vetëvendosje duke bë opozitën kundër PAN, ndërsa ju për rezervën shtetërore e konsideroni edhe sot sekret” , tha ajo.
Seanca plenare me një pikë të vetme të rendi të ditës projektrezoluta për katër vjet qeverisje të kryeministrit të Kosovës, Albin Kurti është duke vazhduar. Ky debat është propozuar nga Aleanca për Ardhmërinë e Kosovës.
