Në emisionin “Këndi i debatit” në TV1, ka pasur një përplasje mes dy kandidatëve për kryetar të Komunës së Kaçanikut,Sabedin Visha nga PDK dhe Jeton Raka nga VV.
Visha ka folur për projektet në komunë dhe ka theksuar se për të diskutuar për to nevojitet hapësirë e madhe:
“Për me fol për projekte duhet me fol kogja hapsirë të madhe, sepse janë projekte që preken edhe shihen në komunën e Kaçanikut. Ndërsa sa i përket kolektorit, kemi projekte të cilat i kemi dërguar nëpër ministri”, ka thënë Visha.
Raka ka kundërshtuar këtë duke pohuar se projektet nuk janë dorëzuar në ministri.
“Jo, nuk është e vërtetë, nuk keni dorëzuar asgjë në ministri edhe nuk keni ardhur me sjell asnjë moment të vetëm. Prej momentit që janë dërguar në rrjete sociale, ju e dini që janë për Kacanikun”, ka thënë Raka.
Visha ka reaguar më pas duke thënë se ka fakte që tregojnë se projektet nuk janë miratuar nga ministria.
Raka ka akuzuar Vishën për propagandë dhe manipulim të qytetarëve.
“Për me bo propagandë, ju jeni të zotë. Ju keni shkuar aq larg sa i përket propagandës, sa në vitin 2021 keni nxitur qytetarët duke më vënë një status, është një status ku unë e kam uruar festën e Bajramit, dhe ju e keni modifikuar për të nxitur urrejtje ndër qytetarë. Në vitin 2025, ju keni nxitur një kusheri tuajin me përmbajtje denigruese, që kishte për qëllim të dëmtonte figurën e dëshmorit”, ka thënë Raka.
