Pas komunës së Bujanocit dhe Preshevës, shqiptarët e Luginës do t’i vazhdojnë protestat në komunën e Medvegjës. Me anë të këtyre protestave ata po kërkojnë të drejtat elementare për jetesë në Serbi. Kryetari i Këshillit Kombëtar Shqiptar thotë se kanë kërkuar monitorim edhe nga OSBE-ja sepse në Medvegjë për herë të parë po protestohet.
Diskriminimi dhe padrejtësia ndaj shqiptarëve të Luginës nuk po ndalet.
E për këtë qëllim të dielën shqiptarët do të protestojnë edhe njëherë për të drejtat e tyre.
Pas komunës së Bujanocit dhe Preshevës, ata do t’i drejtohen komunës së Medvegjës për të treguar diskriminimin e vazhdueshëm.
E në këtë vend, për herë të parë po mbahen protesta nga luginasit.
Kryetari i Këshillit Kombëtar Shqiptar thotë se janë kryer të gjitha përgatitjet mirëpo thotë se kanë kërkuar edhe ndihme prej OSBE-së për monitorim.
Në këtë protestë, prezent do të jenë edhe përfaqësuesit e partive politike.
Deputeti shqiptar në parlamentin e Serbisë, Shaip Kamberi thotë se me këto protesta po kërkojnë të drejtat elementare të pakicave.
E për kryetaren e komunës së Preshevës, Ardita Sinani arsyet që këto protesta po mbahen janë të shumta.
Por ndryshe prej Kamberit dhe Sinanit, kësaj proteste nuk do t’i bashkohet kryetari i komunës së Bujanocit.
Arbër Pajaziti thotë se nuk është ftuar asnjëherë nga këshilli dhe nuk do të merr pjesë.
Shqiptarët e tri komunave që jetojnë në Serbi protestën e parë e kanë mbajtur më 12 gusht në komunën e Bujanocit ndërsa të dytën me 23 shtator në komunën e Preshevës.
